Kreml kontrolindeki Qırım Yuqarı mahkemesi cumaaqşamı künü, aprelniñ 22-nde, Qarasuvbazardaki «Hizb ut-Tahrir davasınıñ» mabüsi Riza Ömerovnıñ apayı, daa evel bir kişilik narazılıq aktsiyasına çıqqan Sevilâ Ömerovağa qarşı memuriy tahqiqatnı toqtattı. Bu aqta «Qırım birdemligi» cemaat imayecisi Ayder Suleymanovğa esaslanıp bildire.
Faallerniñ malümatına köre, qadı Sergey Yakovlev qadınnıñ areketlerinde memuriy uquqnı bozuv alâmetleri yoq dep, Sevilâ Ömerovağa qabaatlav qararını çıqarğan Rusiye kontrolindeki Canköy rayon mahkemesiniñ qararını lâğu etmege qarar berdi.
«Asılında, qadınğa qarşı böyle davalarnı uydurmağa tırışqanlar uquqnı boza. Aqlayıcı qararlar artar, dep ümüt etemiz», – dep izaatladı mahkeme qararını Ayder Suleymanov.
Hatırlatamız, martnıñ 22-nde Rusiye kontrolindeki Canköy rayon mahkemesi Ömerovanı qabaatlı tanıp, sıñırlav tedbiri olaraq tenbiledi.
Kreml kontrolindeki Qırım Yuqarı mahkemesi fevralniñ 24-nde Sevilâ Ömerovanıñ davası tekrar baqılacaq dep qarar çıqarğan edi.
2020 senesi dekabrniñ 27-nde Sevilâ Ömerova Canköy rayonınıñ Qalay (Azovskoye) qasabasında bir kişilik narazılıq aktsiyasını ötkerdi. Qadınnıñ yazuvlı şiarında «Qırımtatarlar terrorist degil! Repressiyalarnı toqtatıñız! Aqayımnı azat etiñiz».
2021 senesi yanvar ayında Sevilâ Ömerovağa politsiya hadimi kelip, bir kişilik narazılıq aktsiyasınen bağlı sorğuğa çekmege tırıştı.
Yanvarniñ 12-nde Rusiye mahkemesi Qarasuvbazardaki «Hizb ut-Tahrir davası» mabüslerini sert rejim koloniyasında qalmalarına üküm etti. Enver Ömerov 18 yılğa, Ayder Cepparov 17 yılğa, Riza Ömerov 13 yılğa üküm etildi. Mahkümler qabaatlarını tanımay.
Ukraina ombudsmeni Lüdmila Denisova qırımlılarğa çıqarılğan ükümni takbih etti, Ukraina Tış işler nazirligi ise Rusiyeden mahkeme qararını lâğu etmesini ve qırımtatarlarnı azat etmesini talap etti. Rusiye tarafı Ukraina nazirliginiñ beyanatına daa cevap bermedi. Qırım Muhtar Cumhuriyeti ve Aqyar prokuraturası Rusiye mahkemesiniñ ükmüni «daa bir repressiya dalğası» dep adlandırdı.
Avropa elçileri Rusiyeniñ Rostov-na-Donu mahkemesiniñ Qarasuvbazardaki «Hizb ut-Tahrir davasınıñ» mabüsleri, qırımtatar musulmanları Enver Ömerov, Riza Ömerov ve Ayder Cepparovğa çıqarğan ükümini takbih etti. Olar qırımlılarnı azat etmege çağırdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
