Rusiyeniñ nezaretinde olğan Aqmescit şeeriniñ Kiyev rayon mahkemesi Rusiyede yasaq etilge "Noman Çelebicihan adına qırımtatar batalyonında" iştirak etüv qabaatı ile Herson vilâyetinden olğan qırımtatar taksici Rustem Gugurikni 8,5 yıl sert apis cezasına mahküm etti. Üküm çıqarılğanı aqqında mahkemeniñ saytında haber etile.
Rusiye FSB-si mahkümniñ adını ve soyadını bildirmeyip, suçlanğan şahıs "batalyonnı maddiy ceetten, asker urbaları, azıq mallar ile temin etkenini" bildirdi. Bundan ğayrı, rusiye quvetçileri erkekni "mahsus ameliyat" zamanı (RF akimiyeti Ukrayinağa qarşı cenkni böyle adlandıra) Herson vilâyetiniñ Geniçesk rayonında rusiyege qarşı aktsiyalarda iştirak etkeninde qabaatladı.
Rusiye mahkemesiniñ malümatına köre, Rustem Gugurikke üküm mahkemeci Olga Küznetsova çıqarğan.
"Gratı" ukrayin neşriniñ malümatına köre, martnıñ 27-nde aqşam Rustem Gugurik apayı ve 6 yaşındaki qızı ile rusiye tarafından işğal etilgen Novoalekseyevka qasabasından Qırımğa ketken. Rusiye büyük istilânı başlamazdan evel çoq balalı baba taksici olaraq çalışqan. Cenk başlağan soñ qorantasını Bağçasaraydaki soylaprını alıp ketmege tırışqan, amma bunı yapamağan. Araba rusiye yoqlav keçitene kelir eken yolcular pasportlarını teşkerüv içün bergenler. Bundan soñ rusiye FSB hadimleri Gugurikni yaqalağan.
Martnıñ 31-nde Rusiyeniñ nezaretinde olğan Aqmescit şeeriniñ Kiyev rayon mahkemesi Rustem Gugurikni "Noman Çelebicihan adına qırımtatar batalyonında" iştirak etüv qabaatı ile eki buçuq ayğa tevqif etkeni belli oldı.
İyünniñ 1-nde Rusiye Yuqarı mahkemesi «Noman Çelebicihan qırımtatar göñülli batalyonını» «terrorist» tanıp, Rusiye Federatsiyasında yasaqladı.
Oktâbrniñ 17-nde Qırımdaki Rusiye mahkemesi qırımtatar Artur Memetşayevni 6,5 yıl apis cezasına mahküm etti. Evel "Qırımtatar resurs merkezi" onıñ Geniçeskte tutıp esir etilgeni aqqında haber etken edi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
