Rusiye nezaretinde olğan Sudaq şeer mahkemesi, “cinayet aqqında malümat bermemegeninen” qabaatlanğan qırımtatar faali ve diniy erbap Ridvan Umerovğa qarşı açılğan cinayet davasını toqtatmaqtan red etti.
Advokat Marlen Halikovnıñ “Qırım birdemligi”ne haber etkenine köre, mahkeme oturışı qapanıq edi.
Halikov bir sıra muracaat bergen, olarnıñ arasında Umerovnıñ cezaiy mesüliyetke çekilmesi içün mahkeme müddetiniñ keçmesi sebebinden cinayet davasınñ toqtatılması. Bundan ğayrı, advokat mahkemeden “FSB hadimleriniñ aytıp yazdırılması” ile “qabaatını boynuna alıp kelüv”ni delil kibi tanımamasını istedi.
“Bundan ğayrı cinayet terkibiniñ olmaması sebebinden cinayet davasınıñ qapıtılması aqqında muracaat berildi. İç bir muracaatımız qanaatlendirilmedi. Nevbetteki mahkeme oturışı fevralnıñ 15-nde olacaq”, – dedi advokat.
Avgustnıñ 31-nde Rusiye quvetçileri Sudaq, İçki ve Seyitler rayonlarında Enver Topçi, Ayder Ablâkimov, Ridvan Umerov ve Ayder Kadırovnıñ evinde tintüv keçirdi.
Dört qırımlığa qarşı Rusiye Ceza kodeksiniñ 205.6 maddesine istinaden (cinayet aqqında haber etmeme) dava açıldı. Oña köre 100 biñ rublege qadar para cezası, 1 yılğa qadar mecburiy işler ya da aynı müddetke apis cezası berile bile.
Mabüsler uquq qoruyıcı organlarına Umicon Dadajonov ile içtimaiy ağlarda yazışqanını bildirmegeninde qabaatlana. O, FSB bildirgenine köre, «Rusiyede terror teşkilâtı tanılğan «IŞİD» teşkilâtınıñ faaliyetinde iştirak etken edi».
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
