Aprelniñ 29-nda Rusiye kontrolindeki Qırımnıñ İçki rayon mahkemesi imam Dlâver Halilovnıñ Savurçı (Zavetnoye) köyünde qıldırğan cuma namazını halqqa açıq tedbir olaraq sayıp, oña 30 biñ ruble para cezasını berdi. Bu aqta advokat Lilâ Gemeci Qırım.Aqiqat mühbirine bildirdi.
«Qabaatlı olaraq celp etilüvine dair qararda imamnıñ angi bir tedbirni keçirgeni añlaşılmay. Qabaatlav tarafı cuma namazını nasıl tasnif etti: yürüş, piket ya da miting olaraqmı? Bular añlaşılmay. Qabaatlav tarafı bunıñ yerine memuriy kodeks maddesiniñ mevzusını ğayrıdan yazdı. Qanunsız faaliyet delilleri de kösterilmedi. Mahkeme, köy sakinleri yazğan 52 müsbet hasiyetnamege emiyet bermeyip, qabaatlayıcı qarar çıqardı», – dep ayttı Kemeci.
Advokatnıñ bildirgenine köre, imamnıñ fikirince, Rusiye kontrolindeki Qırım ve Aqyar musulmanları diniy idaresiniñ reberligi yarımadanıñ mustaqil din cemiyetlerine basqı yapa.
«İmaye bunı QAMDİ siyasetine boysunmağan mustaqil imam, mustaqil din cemiyetleriniñ taqip etilüvi dep saya. Bu din cemiyetiniñ yoq etilüvi QAMDİniñ bu regionda (İçki rayonında – QA) diniy yaşayışnı kontrol altına almaq istegini köstere. Söz sırası, müfti Emirali Ablayevni çağırmaq muracaatımız red etildi», – dep ayttı Gemeci.
Daa evel Dlâver Halilov malümat bermesi içün prokuraturağa çağırılğan edi, Rusiye Memuriy cinayetler kodeksiniñ 5.26 maddesiniñ 4-ünci qısmına istinaden (qanunsız missionerlik faaliyeti) memuriy cinayet qararı berildi.
