Kremlniñ nezaretinde olğan Qırımnıñ Yuqarı mahkemesi Taras Şevçenkonıñ abidesi ögünde çiçekler ile beraber "Cenkke yoq" yazısını qaldırğan Aqmescit sakinine qarşı memuriy uquq bozma aqqında qaranı quvette qaldırdı. Bunıñ aqqında "Qırım esnası" aq qoruyıcı teşebbüsiniñ saytında haber etile.
Bu malümatqa köre, rusiyeli mahkemeci Sergey Yakovlev istinaf şikâyetini red etken. O, Aqmescit sakininden Taras Şevçenkonıñ abidesi ögbne ne içün çiçek qoyğanını ve er sefer çiçek qoyğanda "Cenkke yoq" yazısı olğan levhanı qoyıp qoymağanını sorağan. Mudafaa tarafı qararnı temyiz mahkemesinde temyiz etmek niyetinde.
"Qırım esnası"nıñ malümatına köre, martnıñ 9-nda Rusiyeniñ nezaretinde olğan Aqmescitniñ Merkeziy rayon mahkemesiniñ mahkemecisi Viktor Mojelânskiy qadınnı "Rusiye ordusını itibardan tüşürüv" maddesine binaen qabaatlı tanığan ve 30 biñ ruble para cezasını bergen.
Rusiye mahkemesi bu vaqia aqqında resmiy malümat bermey.
Rusiyeniñ nezaretinde olğan Qurman rayon mahkemesi saba Qırımda küyeçirilgen tintüv vaqtında yaqalanğan Qırımtatar Milliy Qurultayınıñ Merkeziy saylav komissiyasınıñ reisi Zair Smedlâğa 40 biñ ruble para cezasını berdi. O, Rusiyeniñ Ukrayinağa cenki vaqtında "Rusiye ordusını itibardan tüşürüv" ile qabaatlandı.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kıyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
