Rusiye kontrolindeki Qırım Yuqarı mahkemesi aprelniñ 10-nda Nariman Memedeminovnıñ tevqif müddetini uzatuv qararına qarşı imaye bergen temyiz arizasını red etti. «Qırım birdemligi» birleşmesi bildirgenine köre, o, mayısnıñ 16-na qadar SİZOda qalacaq.
Advokat Edem Semedlâyevniñ bildirgenine köre, mahkeme qapalı şekilde keçirildi.
«Mahkeme Nariman Memedeminovnıñ açıq mahkeme oturışuvını keçirmek muracaatını red etti, «esnas iştirakçileri içün telüke bar», dedi. Memedeminov telükesizlik tedbirlerini quvetleştirmege rica etti, faqat Rusiye prokurorı alınğan telükesizlik tedbirleri yeterli dedi, mahkeme ise razı oldı. Nariman Memedeminov açıq mahkeme oturışuvı muracaatını tekrar berdi, çünki taraflar alınğan telükesizlik tedbirleri yeterli olğanını ayttı, amma mahkeme bu ricanı baqmadı», – dedi advokat.
Daa evel haber etilgeni kibi, Semaşko Cumhuriyet hastahanesinde Nariman Memedeminovğa ameliyat yapıldı.
Martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
