Kreml kontrolindeki Aqmescitniñ Kiyev rayon mahkemesi «terrorizm teşviqatında» qabaatlanğan cemaat jurnalisti, bloger Nariman Memedeminovnıñ tevqif müddetini uzattı. O, martnıñ 16-na qadar SİZOda bulunacaq, dep bildire «Qırım birdemligi» birleşmesi.
Faallerniñ malümatına köre, oturışuv qapalı şekilde keçirildi.
Tahqiqatçı ve prokuror mahkemede Memedeminov «Ukrainada saqlana bile, şu sebepten apis müddeti uzatılmalı», dep bildirgenler.
Blogerniñ qayd etkenine köre, o, saqlanıp olamaz, çünki vesiqaları FSB bölüginde buluna.
Martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
