Rusiye kontrolindeki Canköy rayon mahkemesinde martnıñ 22-nde Qarasuvbazardaki «Hizb ut-Tahrir davasınıñ» mabüsi Riza Ömerovnıñ ömür arqadaşı Sevilâ Ömerovağa qarşı memuriy dava boyunca tekrar oturışuv keçirildi.
Cemaat imayecisi Ayder Suleymanovnıñ aytqanına köre, qadı Mariya Yermakova Ömerovanı qabaatlı tanıp, sıñırlav tedbiri tarzında tenbiledi, dep haber etti «Qırım birdemligi» birleşmesi.
«Esnasta politsiya mayorı Nikolay Litvin sorğuğa çekildi. Onıñ bildirgenine köre, Sevilâ Ömerovanıñ Rusiye Federatsiyasınıñ Memuriy bozuvlar kodeksiniñ 20.6.1 maddesine istinaden bozuv yapqanına dair malümatnı o, içtimaiy ağlarda monitoring yapqan «E» Merkeziniñ hadimlerinden bildi. Berilgen malümatqa köre, olar qadınnıñ «bozuvları» aqqında bir qaç malümat tapıp, politsiya mayorına teşkerüvge yolladı», – dep aytıla haberde.
Qayd etilgenine köre, mahkeme bütün taraflarnı diñlep, Sevilâ Ömerovanı qabaatlı tanıp, sıñırlav tedbirini belgilemege qarar aldı.
«İmayeci ükümge qarşı çıqıp, siyasiy mabüsniñ ömür arqadaşını tolusınen aqlamaq içün istinaf bermege niyetlene. Bundan ğayrı, Suleymanov qadı başqaca aytsa da, mahkeme qapalı oldı, dep bildirdi. Qadı Mariya Yermakova epidemiologik vaziyet ve «Qırım Cumhuriyetinde yüksek azırlıq rejiminiñ kirsetilüvine dair» buyruqqa esaslanıp, mahkemege jurnalistlerni kirsetmedi. Mahkemege kelgen bütün qırımtatarlarnı politsiya hadimleri videokamerağa çıqardı», – dep qayd etti «Qırım birdemligi».
Hatırlatamız, Kreml kontrolindeki Qırım Yuqarı mahkemesi fevralniñ 24-nde Sevilâ Ömerovanıñ tekrar baqmağa qarar berdi.
2020 senesi dekabrniñ 27-nde Sevilâ Ömerova Canköy rayonınıñ Qalay (Azovskoye) qasabasında bir kişilik narazılıq aktsiyasını ötkerdi. Qadınnıñ yazuvlı şiarında «Qırımtatarlar terrorist degil! Repressiyalarnı toqtatıñız! Aqayımnı azat etiñiz».
2021 senesi yanvar ayında Sevilâ Ömerovağa politsiya hadimi kelip, bir kişilik narazılıq aktsiyasınen bağlı sorğuğa çekmege tırıştı.
Yanvarniñ 12-nde Rusiye mahkemesi Qarasuvbazardaki «Hizb ut-Tahrir davası» mabüslerini sert rejim koloniyasında qalmalarına üküm etti. Enver Ömerov 18 yılğa, Ayder Cepparov 17 yılğa, Riza Ömerov 13 yılğa üküm etildi. Mahkümler qabaatlarını tanımay.
Ukraina ombudsmeni Lüdmila Denisova qırımlılarğa çıqarılğan ükümni takbih etti, Ukraina Tış işler nazirligi ise Rusiyeden mahkeme qararını lâğu etmesini ve qırımtatarlarnı azat etmesini talap etti. Rusiye tarafı Ukraina nazirliginiñ beyanatına daa cevap bermedi. Qırım Muhtar Cumhuriyeti ve Aqyar prokuraturası Rusiye mahkemesiniñ ükmüni «daa bir repressiya dalğası» dep adlandırdı.
Avropa elçileri Rusiyeniñ Rostov-na-Donu mahkemesiniñ Qarasuvbazardaki «Hizb ut-Tahrir davasınıñ» mabüsleri, qırımtatar musulmanları Enver Ömerov, Riza Ömerov ve Ayder Cepparovğa çıqarğan ükümini takbih etti. Olar qırımlılarnı azat etmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
