Kreml kontrolindeki Qırım Yuqarı mahkemesi Bağçasaraydaki «Hizb ut-Tahrir davasınıñ» eki mabüsi Server Mustafayev ve Memet Belâlovnıñ apis müddetini uzatuv qararına qarşı berilgen temyiz arizasını red etti. Olar avgustnıñ 9-na qadar SİZOda qalacaqlar. Bu aqta advokat Lilâ Gemeci Qırım.Aqiqat mühbirine tarif etti.
«Oturışuv qapalı şekilde keçirildi. Bizge açıq oturışuv olamaz, degenler, çünki qapalı oturışuv qararı endi çıqarıldı. Mahkemeden sebepni ögrenmege istedik, qadı ise poçta vastasınen cevap berecegini ayttı», – dedi advokat.
Onıñ aytqanına köre, imaye, «esnas iştirakçilerinden kimlerden telüke beklenile», dep bilmege istedi. Faqat mahkeme cevap bermeyip, mahkeme esnası iştirakçileriniñ telükesizligini temin etmekten vazgeçti.
«Mahkeme esnasını bir çoq ceetten prokuror idare etti, Server onıñ çekilmesini istedi. Bu muracaat red etildi. Temyiz arizamız qanaalendirilmedi, birinci instantsiya mahkemesiniñ apiste tutuv sıñırlav tedbirini uzatmaq qararı deñiştirilmedi», – dedi Gemeci.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
