Kreml kontrolindeki Qırım Yuqarı mahkemesi Bağçasaraydaki ekinci «Hizb ut-Tahrir davasınıñ» mabüsleri Server Mustafayev ve Edem Smailovnıñ tevqif etilmesine qarşı berilgen itiraz arizalarını yanvarniñ 22-nde baqacaq.
Bu aqta Mustafayevniñ advokatı Sergey Legostov Qırım.Aqiqat mühbirine bildirdi.
Oturışuv Smailovnıñ advokatı Konstantin Rustemovnıñ arizası esasında başqa künge avuştırıldı. Al-azırda o, Moskvada buluna, anda Qara deñizde Rusiye FSBsi tarafından zapt etilgen ukrainalı askerlerden birini qorçalağan edi.
Legostovnıñ qayd etkenine köre, mahkeme Aqmescitniñ Kiyev rayon makhemesi üç ay evelsi – 2018 senesi oktâbrniñ 5-nde – çıqarğan qararnen bağlı itiraz arizasını baqmalı.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
Dekabr ayında Aqmescitniñ Rusiye mahkemesi Mustafayev ve Smailovnıñ apis müddetini eki ayğa uzattı. Olar 2019 senesi fevralniñ 9-na qadar SİZOda qalacaqlar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
