Kreml kontrolindeki Qırım Yuqarı mahkemesi Bağçasaraydaki ekinci «Hizb ut-Tahrir davasınıñ» mabüsleri Memet Belâlov ve Seyran Saliyevniñ tevqif müddetiniñ uzatılmasına qarşı berilgen itiraz arizalarını red etti, dep bildire Qırım.Aqiqat mühbiri.
Böylece, qabaatlanğanlar 2019 senesi fevralniñ 9-na qadar apiste qalacaq.
«Oturışuv qapalı şekilde keçirildi. Müşterimnen beraber açıq mahkeme olmasını rica ettik, amma red cevabını aldıq. Esnas adiy rejimde keçti – qadılar bütün delillerimizni red etti», – dep tarif etti Belâlovnıñ imayecisi Edem Semedlâyev.
Seyran Saliyevniñ advokatı Mammet Mambetov mahkeme onıñ bazı muracaatlarını qanaatlendirdi, amma sıñırlav tedbiriniñ deñiştirilmesine bu tesir etmedi, dep bildirdi.
Bağçasaraydaki «Hizb ut-Tahrir davasınıñ» daa bir mabüsi Marlen Asanovnıñ itiraz arizası yanvarniñ 17-nde baqılmalı, çünki advokat Emil Kurbedinovnıñ şikâyet arizaları kene tercime etilmedi.
2017 senesi oktâbr ayında Rusiye telükesizlik hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
