Kreml nezaretindeki Qırım Yuqarı mahkemesi Bağçasaraydaki «Hizb ut-Tahrir davasınıñ» iştirakçileri Timur İbragimov, Marlen (Suleyman) Asanov, Memet Belâlov, Seyran Saliyev, Server Zekiryayev ve Ernes Ametovnı nezaret altında qaldırdı.
Olar 2018 senesi dekabrniñ 9-na qadar apiste qalacaqlar, dep bildire Qırım.Aqiqat mühbiri.
Ernes Ametovnıñ advokatı Ayder Azamatovnıñ aytqanına köre, tahqiqat Ernes Ametov azatlıqta olıp, «cinaiy faaliyetini devam ettire ve Ukraina pasportını qullanıp, Ukrainada saqlana bile» dep, tevqif müddetini uzatmağa qarar aldı.
«Onı ev apsine almağa rica ettik, amma qadı bunı da red etti. Oturışuv qapalı oldı, amma qarar seslendirilgende Ernesniñ ömür arqadaşı Eleonorağa kirmege izin berildi. Mahkeme, Ernesni dekabrniñ 9-na qadar SİZOda qaldırdı. Qayd etmeli ki, apis müddetini uzatma qararına qarşı bergen evelki şikâyetim alâ daa baqılmadı», – dep qayd etti advokat.
Suleyman Asanovnıñ advokatı Emil Kürbedinovnıñ fikirince, oturışuvlarnıñ qapalı şekilde keçirilmesi «tamamen sebepsizdir».
«Kim telükeli ola – siyasiy mabüs, oña qoltutmağa kelgen insanlar ya da diñleyiciler. Bunı nasıl isbatlay bileler? Mence, qapalı oturışuvlar – siyasiy mabüslerge basqı yapma usulıdır. Kene yerli politsiya hadiminden menfiy hasiyetname keldi, Suleyman ağanı (Asanov – QA) menfiy ceetten tasvirleyler. Aynı vaqıtta bir sıra teşekkürler bar, mektepten başlap şeer memuriyetine qadar», – dep tarif etti Kürbedinov.
2017 senesiniñ oktâbr ayında Rusiye telükesizlik hadimleri Bağçasaraynıñ altı sakinini tutıp alğan edi. Bular – Timur İbragimov, Marlen Asanov, Memet Belâlov, Seyran Saliyev, Server Zakiryayev ve Ernes Ametov. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta. Amma bu maqsatqa irişmek içün terroristik usullar qullanğanını inkâr ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etken edi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
