Cumaaqşamı künü, avgustnıñ 13-nde, işğal altındaki Qırımnıñ Rusiye kontrolindeki Bağçasaray rayon mahkemesi «Hizb ut-Tahrir davasınıñ» mabüsi Marlen Asanovnıñ ömür arqadaşı Ayşe Asanova ile bağlı qararğa qarşı berilgen istinaf şikâyetiniñ baqıluvını başqa künge avuştırdı.
«Bugün, 2020 senesi avgustnıñ 13-nde, advokat Kurbedinov Emilniñ Asanova Ayşe içün bergen istinaf şikâyeti baqılğan mahkeme oturışuvı olıp keçti. Mahkeme, Asanovağa qarşı memuriy protokol tizgen vekil Mihail Çernovol kelmegeni içün oturışuvnı başqa künge avuştırdı», – dep ayttı advokat Rustem Kâmilev «Qırım birdemligine».
Onıñ bildirgenine köre, oturışuv avgustnıñ 28-ne, saat 9:00-ğa avuştırıldı.
Hatırlatamız, Rusiye kontrolindeki Bağçasaraynıñ mirovoy mahkemesi işğal etilgen Qırımda apiske alınğan faal, «Hizb ut-Tahrir davasınıñ» mabüsi Marlen Asanovnıñ ömür arqadaşı Ayşeni 500 ruble (tahminen 190 ğrıvnâ) ile cezaladı.
«Gratı» bildirgenine köre, Ayşe Asanova Marlen Asanovnıñ mahkeme oturışuvlarından birinde oña «Maña nefes kibi kereksiñ» yazısını uzaqtan kösterdi. Bunı mahkeme vekili Mihail Çernovol körip, yazuvlı şiar tuta kibi memuriy protokol tizdi.
Hatırlatamız, aprelniñ 9-nda Rusiye quvetçileri 2017 senesinden berli apiste tutulğan Bağçasaraydaki ekinci «Hizb ut-Tahrir davasınıñ» mabüsi Marlen (Suleyman) Asanovnıñ evine kelip, onı «qanunsız aktsiyalarda» iştirak etmeycek dep «tenbilemege istegen edi».
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
