Rusiye kontrolindeki Qırım Yuqarı mahkemesi dekabrniñ 10-nda ATR telekanalınıñ saibi Lenur İslâmovnı 19 yıl sert rejimli koloniyada qalmasına ğıyabiy şekilde üküm etti. İslâmovnıñ özü bu esnasta iştirak etmedi.
Qırım.Aqiqat mühbiri bildirgenine köre, İslâmov qabaatlavnıñ bütün noqtalarına istinaden qabaatlı tanıldı – «diversiyalarnı teşkil etüv, qanunsız silâlı birleşmeni quruv ve Rusiye topraq bütünliginiñ bozuluvına çağıruv».
Qadılar, ükümde İslâmovnıñ kütleviy haber vastalarınıñ faaliyetinde 2 yıl iştirak etmesini yasaqladı ve 1 yılğa azatlığını sıñırladı.
«Bugün mahkeme Lenur İslâmovnıñ ükmüni çıqardı. Onı 19 yıl sert rejimli koloniyada qalmasına üküm etip, ilâve sıñırlavlar belgilediler. Müvekkilim Lenur İslâmov Qırım Cumhuriyeti Yuqarı mahkemesiniñ yurisdiktsiyasını tanımay. O, Qırımnı vaqtınca işğal etilgen Ukraina toprağı saya, işğalci akimiyetniñ organları da qanunsız ola ve olarnıñ yurisdiktsiyasını o qabul etmey», – dedi advokatı Nikolay Polozov.
İslâmovnıñ imayesi mahkeme qararını şikâyet etmege niyetlene.
Qırım.Aqiqat, ATR saibiniñ fikrini bilmek içün şahsen bağlanmağa tırıştı, amma o, cevap bermey.
Rusiye FSBsi 2015 senesi oktâbr ayında Lenur İslâmovğa qarşı cinaiy dava açıp, onı federal qıdıruvğa ilân etti.
Rusiye akimiyeti İslâmovnı federal qanunğa zıt bir şekilde silâlı birleşme qurğanında (Rusiye Ceza kodeksiniñ 208-inci maddesiniñ 1-inci qısmı), diversiyalar yapıp, büyük mülk zararı ketirgeninde (Rusiye Ceza kodeksiniñ 281-inci maddesiniñ 2-nci qısmınıñ «a», «b» noqtaları), kütleviy haber vastaları üzerinden Rusiye topraq bütünligini bozmağa çağırğanında (Rusiye Ceza kodeksiniñ 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı) qabaatladı.
İslâmovnıñ Qırım.Aqiqatqa bildirgenine köre, onıñ Rusiye kontrolindeki Qırım Yuqarı mahkemesiniñ oturışuvlarında iştirak etmege niyeti yoq. O, Qırımda oña qarşı esnasnı «sahte mahkeme» dep adlandırdı.
