Rusiye kontrolindeki Qırım Yuqarı mahkemesi Aluştadaki «Hizb ut-Tahrir davasınıñ» dört mabüsini apiste qaldırdı, dep haber ete Qırım.Aqiqat mühbiri.
Ruslan Mesutov, Eldar Kantimirov, Ruslan Nagayev ve Lenur Halilov mayısnıñ 5-ne qadar SİZOda qalacaqlar.
Mahkeme oturışuvı qapalı edi, dava mabüsleriniñ tuvğanlarını oturışuvğa kirsetmediler.
«Bugün qapalı esnas oldı, açmağa rica ettik, çünki dava mabüsleri videokonferentsiya bağı vastasınen SİZOdan iştirak etti, lâkin qadı muracaatımıznı red etti, netice qısmını seslendirgende bile tuvğanlarına kirmege izin bermedi. Biz apiste tutuvnen bağlı olmağan sıñırlav tedbiri aqqında rica ettik, faqat mahkeme delillerimizni diñlep, istinaf şikâyetimizni red etti ve müvekkillerimizni SİZOda qaldırdı», – dep tarif etti advokat Ayder Azamatov.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi. Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
