Rusiye kontrolindeki Qırım Yuqarı mahkemesi, advokat Nikolay Polozovğa yarımadada ğıyabiy şekilde mahküm etilgen Qırımtatar Milliy Meclisiniñ reisi Refat Çubarovnı qorumağa izin bermemege devam ete.
Advokatnıñ qayd etkenine köre, o, bir sıra istinaf arizalarını berip, em halqara, em Rusiye qanunları bozula, dep bildirdi.
«Qırım Yuqarı mahkemesi bala masalından Jiharka kibi, el-ayaqlarınen tirene, Refat Çubarov saylağan advokatqa onı qorumağa izin bermeyip, tek Rusiye Anayasasını (iyül deñişmelerinen beraber) degil, bir sıra halqara añlaşmanı, hususan Vatandaş ve siyasiy aqlar muqavelesi, em de Avropa insan aqları ve esas serbestliklerni qoruv şartnamesini boza», – dep yazdı Polozov Facebookta.
Onıñ aytqanına köre, bu bozuvlar «qayd etile ve ileride halqara qurulışlarda qullanılacaq».
Aqmescitte iyülniñ 23-nde mahkemede Qırımtatar Milliy Meclisiniñ reisi Refat Çubarovğa qarşı cinaiy dava temelden baqılıp başlandı. Mahkeme vekilleri diñleyicilerni oturışuvğa ve mahkeme binasına kirsetmedi, dep bildirdi «Qırım esnası» teşebbüsiniñ faalleri.
Advokat Nikolay Polozovnıñ Qırım.Aqiqatqa bildirgenine köre, oña bu davada Çubarovnı qorçalamağa izin bermediler, çünki «menfaat zıddiyeti bar». O, bu qararnı şikâyet etmege niyetlene. Aqmescitte mahkeme advokat Polozovnıñ şikâyetini endi red etken edi.
Bu sene mart ayınıñ soñunda Rusiye Tahqiqat komiteti Qırımtatar Milliy Meclisiniñ reisi Refat Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212 maddesiniñ 1-inci qısmı (qalabalıqlarnı teşkil etüv), 280.1 maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq faaliyetke açıq çağıruv) açıldı.
Çubarovnıñ qayd etkenine köre, Rusiye akimiyeti «qırımtatar halqına qarşı daa bir repressiya dalğasını başlattı».
Advokat Nikolay Polozov Rusiye tahqiqatçısınıñ onı işğal altındaki Qırımda Çubarovğa qarşı kene açılğan davada imayeden çetleştirmek niyeti aqqında bildirdi.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı.
