Advokat Nikolay Polozovnıñ bildirgenine köre, Rusiye kontrolindeki Qırım Yuqarı mahkemesi oña Qırımtatar Milliy Meclisiniñ reisi Refat Çubarovnı qorumağa izin bermegen soñ Qırım davası boyunca eñ az 16 zarar körgen kişini ve qabaatlav tarafınıñ şaatını sorğuğa çekildi.
«Tek bugünki oturışuvda eñ az 16 zarar körgen kişi ve qabaatlav tarafınıñ şaatları sorğuğa çekildi. Üçünci istinaf mahkemesi Refat Çubarov saylağan advokatnı kirsetmemek qararına qarşı şikâyetni baqacaq 45 kün içinde mümkün olğanı qadar çoq delil ketirmege, eñ yahşısı da üküm çıqarmağa isteydirler», – dep yazdı advokat Facebook saifesinde.
Advokat Nikolay Polozov, Qırımtatar Milliy Meclisiniñ reisi Refat Çubarovnıñ Qırım davasında imaye olamağanı içün Rusiye kontrolindeki Qırım Yuqarı mahkemesinden oña Rusiye umumiy adliye Üçünci istinaf mahkemesine (Soçi) şikâyet etmege imkân bergen vesiqanı aldı, dep bildirdi.
Aqmescitte iyülniñ 23-nde mahkemede Qırımtatar Milliy Meclisiniñ reisi Refat Çubarovğa qarşı cinaiy dava temelden baqılıp başlandı. Mahkeme vekilleri diñleyicilerni oturışuvğa ve mahkeme binasına kirsetmedi, dep bildirdi «Qırım esnası» teşebbüsiniñ faalleri.
Advokat Nikolay Polozovnıñ Qırım.Aqiqatqa bildirgenine köre, oña bu davada Çubarovnı qorçalamağa izin bermediler, çünki «menfaat zıddiyeti bar». O, bu qararnı şikâyet etmege niyetlene. Aqmescitte mahkeme advokat Polozovnıñ şikâyetini endi red etken edi.
Bu sene mart ayınıñ soñunda Rusiye Tahqiqat komiteti Qırımtatar Milliy Meclisiniñ reisi Refat Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212 maddesiniñ 1-inci qısmı (qalabalıqlarnı teşkil etüv), 280.1 maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq faaliyetke açıq çağıruv) açıldı.
Çubarovnıñ qayd etkenine köre, Rusiye akimiyeti «qırımtatar halqına qarşı daa bir repressiya dalğasını başlattı».
Advokat Nikolay Polozov Rusiye tahqiqatçısınıñ onı işğal altındaki Qırımda Çubarovğa qarşı kene açılğan davada imayeden çetleştirmek niyeti aqqında bildirdi.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı.
