Qırımnıñ Yuqarı mahkemesi "Qırım birdemligi"niñ Bağçasaraydan altı faaliniñ apisten azat etilmesi ile bağlı şikâyetni red etti. Seydamet Mustafayev, Eldar Yakubov, Abdulmecit Seytumerov, Ruslan Asanov, Amethan Umerov ve Remzi Nimetulayev 2023 senesi oktâbrniñ 23-ne qadar tevqifli qalacaq. Bunı "Qırım birdemligi"ne olarnıñ advokatları haber etti.
İmayeciler tahqiqat qırımtatar faallerini terroristik faaliyetinde esassız qabaatlağanını saya. Seydamet Mustafayevniñ advokatı Safiye Şabanova şikâyette müşterisini ev apsine yollamaq kerek olğanı aqqında yazdı: onıñ dört kiçik baladan olğan büyük ailesi bar. Qorantasınıñ oña ihtiyacı bar.
Mahkeme Mustafayevniñ iç bir vaqıt yasaq faaliyet ile oğraşmağanı, er zaman "normal" bir yaşayış tarzı sürgeni ve çatışmalarda körünmegeni ile bağlı delillerni de qabul etmedi.
Advokat Refat Yunusov tahqiqatnıñ Ruslan Ametovnıñ tahqiqat tevqifhanesine yollanması içün yeterli qadar delili taqdim etmegeninde israr etti.
Diger advokat Edem Semedlâyev ise mahkmeniñ müvekkili Amethan Umerov içün başqa bir sıñırlama tedbiriniñ saylanması içün "bir delil bile" qabul etmegenini qayd etti.
Abdulmecit Seytumerovnıñ imayecisi Emil Kurbedinov şularnı qayd etti: "FSB hadimleri kerçekke uyğun kelmegen materiallar taqdim etti".
Avgustnıñ 24-nde Bağçasarayda ve Bağçasaray rayonında Rusiye uquq qoruyıcıları qırımtatarlar Ruslan Asanov, Seydamet Mustafayev, Remzi Nemetulayev, Abdulmecit Seytumerov, Amethan Umerov ve Eldar Yakubovnıñ evlerinden tintüv keçirdi. Bundan soñ olarnı Aqmescitteki FSB binasına alıp ketkenler. Avgustnıñ 25-nde Rusiye mahkemesi olarnı eki ayğa SİZOğa yolladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
