Rusiye kontrolindeki Aqmescitniñ Kiyev rayon mahkemesinde tutulğan Nariman Seytaliyevge SİZO-da tutuv şeklinde tevqif tedbiri tayin etildi. Mahkemeci Olga Kuznetsova Qırımtatarnı 2026 senesi çeçek ayınıñ 11-ne qadar apiske aldı. Bunı "Qırım birdemligi" cemaat birleşmesi bildire.
Rusiye quvetçileri kiçik aynıñ 12-nde saba Bağçasaray rayonınıñ Ulaqlı köyünde yaşağan 42 yaşındaki Nariman Seytaliyevniñ evinde tintüv keçirdi. Tintüvden soñ onı tutıp, evden alıp kettiler.
Onıñ ömür arqadaşı Zarema, tintüv saba saat dörtte başlağanını bildirdi. Narimannı yerge yatqızıp, qollarını arqasına bağladılar ve qırmaçalap qoydılar. Binağa onğa yaqın adam kirdi.
Tutulğannıñ apayı aytqanı kibi, advokatnen bağlanmağa imkân berilmedi. Oña, tintüv bitken soñ telefon etmek mümkün olmaycaq, dep ayttılar.
Seytaliyevniñ vesiqaları, cep telefonı, qorantası aytqanı kibi, hadimler ketirgen eki kitap da tutıp alındı.
Bundan evel Qırımtatar resurs merkezi Qırımda insan aqlarınıñ bozuluvı aqqında 2025 senesiniñ esabatını derc etti, oña köre, ilhaq etilgen yarımadada bir yıl devamında 244 apiske aluv qayd etildi, olardan 90 Qırımtatarlarğa nisbeten. Bundan ğayrı, 40 tintüv, 159 yaqalanuv, 158 sorğu, sorav ve "subet" qayd etildi.