Qırımdaki «Hizb ut-Tahrir davasınıñ» mabüsi Vadim Bektemirov mecburiy mahkeme-psihiatrik ekspertizasınıñ keçirilüvi içün Qırım klinik psihiatrik hastahanesine avuştırıldı. Bu aqta advokat Marlen Halikov bildirdi, o, 2020 senesi avgustnıñ 20-nde müvekkilini tibbiy müessisede ziyaret etti, dep bildire «Qırım birdemligi» cemaat birleşmesi.
«Laf etip, sağlığını, umumen nasıl olğanını bildim. Vadim er keske selâm ayttı. Kitap ve gazet ketirmege rica etti, hastahanede malümat az olğanını is ete. Tuvğanlarına onıñ içün qasevetlenmesin dep aytmamnı istedi. Qol tutqan halqqa teşekkürlerini bildirdi», – dep ayttı advokat.
Vadim Bektemirov – arap edebiyatı ve gumanitar ilimler fakültetiniñ «İslâm ilimleri» magistri, «Al-Cinan» universitetini (Trablus, Lübnan) bitirdi. Apiske alınmazdan evel siyasiy mabüslerniñ qorantaları içün dualarnı alıp bardı, apiske alınğan qırımtatar musulmanlarına aş alıp ketti, mahkemelerge bardı.
Rusiye quvetçileri Bektemirovnı iyülniñ 7-nde Qırımda keçirilgen kütleviy tintüvlerden soñ tuttı. Onı Rusiyede ve işğali altındaki Qırımda yasaqlanğan «Hizb ut-Tahrir» teşkilâtınıñ faaliyetini teşkil etkeninde qabaatlaylar.
Ukraina prezidentiniñ Qırım Muhtar Cumhuriyetindeki temsilciligi Rusiye quvetçileriniñ areketlerini takbih etti, Qırım Muhtar Cumhuriyeti ve Aqyardaki Milliy politsiyanıñ Baş idaresi ise Ukraina Ceza kodeksiniñ 162-nci maddesiniñ 2-nci qısmına istinaden (mesken tiyilmemezliginiñ bozuluvı) ve Ukraina Ceza kodeksiniñ 146-ncı maddesiniñ 2-nci qısmına istinaden (qanunsız alda azatlıqtan marum etüv) cinaiy tahqiqat başlattı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
