Qurmandaki «Hizb ut-Tahrir davasınıñ» mabüsi Eskender Abdulganiyevniñ anası Emine Büyük Onlar qasabasınıñ polisine çağırıla. «Qırım birdemligi» bildirgenine köre, Abdulganiyevağa qarşı «bir kişilik narazılıq aktsiyası vaqtında olğan bozuvlar sebebinden memuriy protokol tizecek olalar».
«Qadınğa protokol tizilecek vaqıt ve yer qayd etilgen haber yollağanlar ve aprelniñ 15-nde Qırım Cumhuriyeti Qurman rayonındaki Büyük Onlar qasabasınıñ İç işler nazirligi bölügine kelmege aytqanlar. Vesiqağa köre, oğlunıñ büyük apis cezasına qarşı yazuvlı şiar ile bir kişilik narazılıq aktsiyası vaqtında onıñ areketlerinde Rusiye Federatsiyası Memuriy bozuv kodeksiniñ 20.2 maddesiniñ 5-nci qısmına (Toplaşuv, miting, numayış, yürüş ya da narazılıq aktsiyasını keçirüv nizamını bozuv) istinaden uquq bozuluvı qayd etildi», – dep bildirdi cemaat birleşmesi.
Qayd etilgenine köre, bu maddege köre 10 biñden 20 biñ rublege qadar para cezası ya da 40 saat mecburiy iş berile bile.
«Emine Abdulganiyeva areketlerine kesilgen qıymet ile razı degil ve uquq qoruyıcı organları hadimleriniñ areketlerini şikâyet etmege niyetlene. Bu cinaiy davanıñ siyasiy mabüsleriniñ daa eki anası politsiyağa çağırılğan edi», – dep bildirdi «Qırım birdemligi».
Bu malümat Rusiye kontrolindeki Qırımnıñ quvet müessiseleri saytlarında tasdıqlanmay.
Bu yıl yanvar ayında Qurmandaki «Hizb ut-Tahrir davası» boyunca üküm etilgen Rustem Emiruseinov, Eskender Abdulganiyev ve Arsen Abhairov Rostov SİZOsından Novoçerkasskqa avuştırlıdı, olarnıñ aytqanına köre, «andaki şaraitler insanlar içün yapılmağan».
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi noyabrniñ 3-nde Qurmandaki «Hizb ut-Tahrir davasınıñ» üç mabüsini 42 yılğa apiske üküm etti. Rustem Emiruseinovğa 17 yıl apis cezası berildi, ilk eki yılı apishanede, qalğanı sert rejimde keçecek. Arsen Abhairov 13 yılğa üküm etildi, ilk eki yılı apishanede keçecek. Eskender Abdulganiyev 12 yılğa üküm etildi, ilk eki yılını apishanede keçirecek.
Hizb ut-Tahrir davası
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
