Rusiyeniñ Rostov-na-Donu şeerindeki Cenübiy okrugınıñ arbiy mahkemesiniñ qadısı Roman Saprunov Aluştadaki «Hizb ut-Tahrir davası» oturışuvında teneffüsni ilân etip, esnasnı bir aftağa qaldırdı. Bunıñ sebebi diger qadı Rizvan Zubairovnıñ «sağlıq vaziyeti sebebinden kelip olamağanı» ola, dep bildirdi.
Bu aqta «Qırım birdemligi» birleşmesi haber ete.
Saprunov, Bağçasaraydaki ekinci «Hizb ut-Tahrir davasınıñ» da oturışuvı başqa vaqıtqa qaldırılacaq, çünki Zubairov bu esnasta reis qadı ola, dep bildirdi.
Eldar Kantimirov, Ruslan Mesutov, Ruslan Nagayev ve Lenur Halilov – Aluştadaki «Hizb ut-Tahrir davasınıñ» mabüsleridir. Rusiye quvetçileri qırımlılarnı 2019 senesi iyünniñ 10-nda keçirilgen tintüvlerden soñ tuttı.
Bağçasaraydaki ekinci «Hizb ut-Tahrir davasını» Rusiye mahkemesi 2019 senesi noyabr ayında baqıp başladı. 2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay. «Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
