Rostov-na-Donu şeerindeki Cenübiy arbiy bölge mahkemesiniñ ekinci Bağçasaray "Hizb ut-Tahrir davası" boyunca oturışında mahkemeci Rizvan Zubairov qırımtatar faali Zair Smedlâğa qırımtatar tilinde şaatlıq etmege razı olmadı. Bunı "Qırım birdemligi" birleşmesi haber ete.
"Men imaye şaatı sıfatında anda bulundı. Mahkeme ana tilimde laf etmek ıntıluvımnı inkâr etti, ancaq Qırım Cumhuriyetiniñ Anayasası, qırımtatar tili rus ve ukrain tillerinen beraberlikte Qırımda devlet tili olğanını köstere, amma mahkeme menim aqqımnı yerine ketirmege imkân bermedi", - dedi faal.
Mahkemeci, arbiy mahkemelerde mahkeme işleri tamam rus tilinde olğanı içün rusça şaatlıq etmek kerek olğanını qayd etti. Mahkeme, rus tilinde laf etmekniñ red etüvini şaatlıqtan vazgeçüv kibi qabul etecegini bildirdi.
Smedlâ, rus tiline keçmege mecbur olğanını bildirdi.
Daa evel Aluşta "Hizb ut-Tahrir davası" boyunca oturışta advokat Ayder Azamatov, müşterisiniñ qırımtatar tilinde tefsirleri sebebinden mahkemeci Roman Saprunovnen davalaştı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
