Qurmandaki «Hizb ut-Tahrir davasınıñ» mabüsi Arsen Abhairovnıñ anası Zeliha Abhairovağa qarşı memuriy dava açıldı ve Rusiye Memuriy bozuv kodeksiniñ 20.2 maddesiniñ 5-nci qısmına istinaden bozuv alâmetleri boyunca memuriy tahqiqat keçirile.
Bu aqta «Qırım birdemligi» cemaat birleşmesi qırımlı advokat Lilâ Gemeciniñ malümatına esaslanıp haber ete.
Qayd etilgenine köre, tahqiqatnı Qurman rayonındaki Rusiye İç işler nazirligi bölüginiñ politsiya vekâletlisi, politsiya kapitanı Oleg Şerigov kontrol ete. «Qırım birdemliginde» olğan vesiqa kopiyasında aynı qarar bir kişilik narazılıq aktsiyasınıñ diger iştirakçisi Zure Emiruseinovağa qarşı da çıqarıldı. Siyasiy mabüslerniñ anaları keçirgen bir kişilik narazılıq aktsiyalarınıñ yeri ve vaqtı farqlı oldı.
Vesiqada haber etilgenine köre, Emiruseinova Alabaş Qoñrat (Amurskoye) köyü yanında «Ukrainskaya–Aqmescit–Aluşta–Yalta sıñırınıñ» yol çetinde turğan edi. Şerigovnıñ aytqanına köre, piket künü birisi telefonda haber etti. Ekinci qadınnıñ narazılıq aktsiyası aqqında politsiya hadimleri Facebooktan haber aldı.
«Qırım birdemligi» cemaat birleşmesiniñ Facebook içtimaiy ağındaki monitoringi vaqtında Abhairova Zelihanıñ bir kişilik narazılıq aktsiyası qayd etildi», – dep aytıla qararda.
Qurman rayonındaki Rusiye İç işler nazirliginiñ bölügi «bayağı vaqıt talap etken Rusiye Memuriy bozuv kodeksiniñ 26-ncı maddesine istinaden protsessual areketlerniñ keçirilüvi, hususan şaatlarnı belgilemek» içün vaqıt kerek.
«Bunı izaatlamaq zor. Eki farqlı bir kişilik narazılıq aktsiyalarını bir mitingge nasıl birleştirecekler, bilmeyim. Malümatnı ögrenecekmiz», – dedi Gemeci.
Hatırlatamız, oktâbrniñ 31-nde Qurmandaki «Hizb ut-Tahrir davası» mabüsiniñ anası Zeliha Abhairova oğlu Arsenniñ taqip etilüvine qarşı bir kişilik narazılıq aktsiyasına çıqtı.
Noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
