Qırımdaki Rusiye FSBsi hadimleri «Asker» cemaat birleşmesiniñ komandan vekili Evelina Arifovanıñ ana-babası yaşağan evde tintüv keçirdi. Bu aqta «Qırım birdemligi» bildire.
Bu malümatnı Arifova özü de Facebook saifesinde tasdıqladı.
«Bugün vaqtınca işğal etilgen Qırımda ana-babamnıñ evinde FSB tintüv keçirdi. Tafsilâtlı bir malümatım daa yoq», – dep yazdı o.
Qırımtatar faalleriniñ bildirgenine köre, bir buçuq saat devam etken tintüv vaqtında planşet alındı. Tintüvden soñ FSB hadimleri Arifovanıñ ana-babasına cuma künü, yanvarniñ 25-ne, celpname berdi.
Saba haber etilgenine köre, Aqmescitteki Borçoqraq (Fontanı) mikrorayonınıñ Emel soqağında tintüv keçirilgen edi.
Rusiye FSBsi hadimleriniñ haber etkenine köre, Qırımda «Noman Çelebicihan qanunsız ukrain batalyonı» eki iştirakçisiniñ evlerinde tintüvler keçirile, dep bildire Rusiye kütleviy haber vastaları yanvarniñ 23-nde saba.
2018 senesi noyabr ayında advokat İslâm Velilâyev bildirdi ki, Qırımda «qanunsız silâlı birleşmelerde» iştirak etüv içün cinaiy taqipler çoqlaşa bile.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Qırımtatar Milliy Meclisi, bu meselenen bağlı bütün malümat Ukraina prezidenti Petro Poroşenko ve İç işler naziri Arsen Avakovğa berildi, dep qayd etken edi.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
