Qırımda Rusiye quvetçileri advokat, qırımtatar faalleri, vatandaş jurnalistleri ve aq qorçalayıcılarğa «qanunsız aktsiyalar keçirilmeycegine dair» tenbiler ketire. Böyle tenbiler yarımadanıñ bir qaç rayonında berildi, dep haber ete «Qırım birdemligi».
«Qırım Cumhuriyetinde 2021 senesi fevralniñ 23-nden 26-na qadar «ekstremist aktsiyalarnıñ» keçirilmesi azırlanıla», – dep aytıla tenbi metninde.
Hususan, bu vesiqa advokat Emine Avamileva, 2019 senesi Moskvada narazılıq aktsiyalarında iştirak etken Rustem Hoşça, Bağçasaray sakini Mustafa Abdurahmanov, «Qırım birdemliginiñ» mühbirleri Nuri Abduraşitov ve Muracon İbragimov, faal Remzi Zudiyev ve Qırımda çeşit cemaat ve aq qorçalayıcı teşebbüsleriniñ iştirakçisi Zekkiy Kulametovğa berildi. Prokuratura alıp ketirilmek ıntıluvı aqqında Lenora Dülber Facebook saifesinde bildirdi.
Qırımnıñ Rusiye prokuraturası tenbi vesiqasında, «uquq qoruyıcılarnıñ organları elde etken malümatqa köre», Qırımtatar Milliy Meclisiniñ tarafdarları «Qırım birdemligi» cemaat birleşmesinen beraber aktsiyalar keçirecek ola, dep aytıla.
«O seferlerde «Qırım birdemligi» qayd etilmedi, bu sefer ise, olarnıñ fikirince, Meclis ve «Qırım birdemligi» «qanunsız tedbirler keçirecek» eken», – dep izaatladı Emine Avamileva.
Advokat, oña berilgen tenbi vesiqasını «sebepsiz ve qanunsız» dep saya ve onı mahkemede şikâyet etmege niyetlene.
«Qırım akimiyetiniñ emrinen kene tenbiler ketirile, maqsad Qırımda olğan er angi farqlı fikirlerni bastırmaq ve kontrol etmek. Olar eminler, insanlar bir tesir altında qalıp areket eteler ve bu olarnıñ eñ büyük yañlışı. Organlarnıñ iç bir malümatı yoq, bu kâğıtlar ise siyasiy alet olaraq qullanıla. Em politsiya, em insanlar bu kimge ve ne içün kerek olğanını añlay», – dep izaatladı uquq qoruyıcılarnıñ areketlerini faal Lutfiye Zudiyeva.
Qırımdaki politsiyanıñ resmiy izaatları yoq.
Yanvarniñ soñunda Qırımnıñ İçki qasabasınıñ sakinlerine Rusiye politsiyası «qanun bozulmaycağına dair» tenbiler berdi. Bundan evel böyle tenbiler Eski Qırımda qırımtatar faallerine kelgen edi.
Fevralniñ 26-nda cemaatçılıqnıñ teşebbüsi ile «Qırımnıñ Rusiye işğaline qarşı tirenüv künü» qayd etile. Şu künü Ukrainada ve dünyada qırımlılarğa ve memleketniñ topraq bütünligine qoltutuv aktsiyaları, munaqaşa, forum, miting ve yürüşler keçirile.
2014 senesi fevralniñ 26-nda Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçken edi. Miting iştirakçilerine qarşı Rusiye tarafdarları, hususan «Rus birligi» firqası çıqtı.
2020 senesi yanvar ayında Ukraina Yuqarı Radasınıñ deputatları, olarnıñ arasındaAhtem Çiygoz ve Rustem Umerov, Ukraina prezidenti Volodımır Zelenskıygemuracaat etip, Qırımnıñ Rusiye işğaline qarşı tirenüv kününi devlet seviyesinde resmiy şekilde belgilemesini rica etti.
