Sentâbr ayında Rusiye uquq qoruyıcıları işğal etilgen Qırımda 5 tintüv keçirdi ve qırımtatarlarğa qarşı 7 memuriy iş açtı, mahkemeler 2000 ruble (855 ğrıvnâ – QA) para cezalarını tayin etti ve umumen alğanda 27 kün memuriy tevqif qararını çıqardı.
Bunı Qırım.Aqiqat mühbirine uquqçı Nazim Şeyhmambetov sentâbrniñ 29-nda «Qırım birdemligi» cemaat birleşmesiniñ toplaşuvında haber etti.
Uquqçınıñ qayd etkenine köre, bu qırımtatarlarnıñ cemaat faaliyeti eksilsin dep, qırımtatarlarğa basqı yapılğanınıñ bir alâmetidir.
«Ayrı insanlarnıñ problemi degil. Bir insannı tutıp alğanda er keske aytacaq olalar: seniñ alâqañ olsa, kirişme, evde otur. Maqsadları – halqqa basqı yapıp, hususan içtimaiy ağlarda fikir bildirmekten evel yüz kere tüşünmege, qomşusına tintüvge barmazdan evel biñ kere tüşünmege mecbur etmektir», – dedi Şeyhmambetov.
Uquqçı Eski Qırımlı Kulametovlar qorantasınıñ memuriy işler boyunca taqip etilgenini hatırlattı.
«Kulametovlarnıñ evine tintüv keçirmege kelip, neticede 2000 ruble para cezasını tayin etkenler. Amma Gollivud filmleriniñ eñ eyi ananelerine köre mahsus operatsiya yapıldı – maskalı silâlı insanlar tutıp ala edi. Cinayetke qarşı küreş aqqında aytmağa acet yoq», – dep qayd etti Şeyhmambetov.
Qırımtatar Milliy Meclisiniñ reisi Refat Çubarov Jenevada BM insan aqları şurasınıñ 39-ıncı sessiyasında çıqışta bulunıp, Qırım yarımadasında barışıq toplaşuv, birleşüv, din ve areket aqları bozulğanını qayd etti.
İnsan aqları ve halqara gumanitar aqqı saasında bozuvlarnı qayd etken BM Monitoring missiyasınıñ reisi Fiona Freyzer, soñki 10 ay devamında yarımadada insan aqları vaziyeti deñişmegenini bildirdi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
