Rusiye kontrolindeki Qarasuvbazar rayon mahkemesi faal İrfan Bekirovnıñ memuriy davası boyunca protokol tizgen politsiya hadimlerini sorğuğa çekecek, dep bildire «Qırım birdemligi» cemaat birleşmesi.
Uquq qoruyıcı organları hadimleriniñ fikirince, faal 2020 senesi aprelniñ 1-nde Rusiye Memuriy bozuv kodeksine kirsetilgen 20.6.1 maddesine istinaden (Fevqulâde vaziyette ya da onıñ peyda oluv telükesi olğanda areket qaidelerine riayet etmeme) areket etti. Bu aqta cemaat imayecisi Seyt-Osman Karaliyev ayttı.
«Qadı qabaatnı tanıymızmı dep soradı. Biz İrfa Bekirov qabaatını tanımay, dep cevap berdik. O, dava baqıluvı tarafsız olsun dep, protokolnı tizgen ve rapor bergen şaatlar sorğuğa çekilmeli, dedi. Er şeyni baqmamız içün vaqıt kerek, şunıñ içün mahkeme fevralniñ 1-ne qaldırıldı», – dep tarif ete Seyt-Osman Karaliyev.
2020 senesi noyabrniñ 3-nde faal İrfan Bekirov Rusiye kontrolindeki Qırım arbiy garnizon mahkemesiniñ binası ögünde tutulğan edi. O, Qırımdaki «Hizb ut-Tahrir davasınıñ» mabüsleri Arsen Abhairov, Rustem Emiruseinov ve Eskender Abdulganiyevge çıqarılğan üküm sebebinden qol tutuv aktsiyasında iştirak etti – mabüslerge o künü büyük apis cezaları berildi.
Advokatlar Rustem Kâmilev ve Ayder Azamatovnıñ bildirgenine köre, o künü uquq qoruyıcı organlarınıñ hadimleri «Qırım birdemliginiñ» eki mühbiri ve faal İrfan Bekirovğa qarşı tizgen memuriy protokollar politsiyağa protsessual bozuvlar sebebinden qaytarıldı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
