Mayısnıñ 11-nde Zuya qasabasında sovetlerniñ arbiyi, Sovetler Birliginiñ qaramanı Seytnafe Seytveliyev ve qırımtatar ressamı Ramiz Netovkinniñ hatırasına boks yarışı keçirildi. Qırımnıñ çeşit köşelerinden 90 genç boksçı toplaştı, dep bildire Qırım.Aqiqat mühbiri.
Yarış başlamazdan evel Ramiz Netovkinniñ hatırasını saqlav teşebbüs gruppasınıñ azası, qırımtatar cemaatçısı Eskender İlyasov çıqışta bulundı. O, yaş sportçılarğa Ramiz Netovkinniñ ğalebeleri aqqında tarif etip, teşkilâtçılarğa teşebbüs gruppasınıñ bahşışlarını berdi.
«Teşebbüs gruppamıznıñ muracaatından soñ teşkilâtçılar bu büyük yarışnı, evelden planlaştırılğanı kibi, tek Seytnafe Seytveliyevniñ hatırasına degil, meşur ressam Ramiz Netovkinniñ hatırasına da bağışladı. Yañı nesilniñ meşur qırımlılarnı bilmesi kerek. Netovkinniñ hatırasını saqlamaq içün planlarımız büyük ve bu müim cemaat işinde ittifaqdaşlarımız ket-kete daa çoq olğanına quvanamız», – dep ayttı Qırım.Aqiqatqa İlyasov.
2018 senesi oktâbr ayında qırımlı faaller ressam Ramiz Netovkinniñ hatırasını saqlav teşebbüs gruppasınıñ qurulğanını ilân etken edi.
Daa soñra Qarasuvbazarda Netovkinniñ hatırasını saqlav teşebbüs gruppasınıñ toplaşuvında oña abide tiklemege teklif etildi.
Aprelniñ başında Qarasuvbazarnıñ ülkeşınaslıq müzeyinde Ramiz Netovkinniñ hatıra aqşamı keçirildi.
Ramiz Netovkin 1960 senesi Taşkent vilâyetiniñ Almazar qasabasında dünyağa keldi. 1975 senesinden berli Qarasuvbazarda yaşadı. 1980 senesi Samokiş Aqmescit bediiy oquv yurtunı bitirdi. «Qarasuvbazarnıñ civarları» albomı içün Bekir Çoban-Zade mukâfatınıñ «Qarasuvbazarnıñ keçmişi, bugüni ve kelecegini aks ettirgen eñ eyi eser» kategoriyasınıñ laureatı oldı. 1983 senesinden başlap vilâyet, cumhuriyet ve çetel sergileriniñ faal iştirakçisi oldı.
Aqmescit, Bağçasaray, Kezlev, Aluşta, Moskva (Rusiye), Tartu (Estoniya), Varşava ve Lüblin (Poloniya), New York (ABD), Kastamonuda (Türkiye) şahsiy sergileri keçirildi. Ressam 2011 senesi iyülniñ 16-nda vefat etti.
