Rusiye kontrolindeki İslâm Terek rayon mahkemesinde Noman Çelebicihan batalyonında iştirak etkeninde qabaatlanğan Mecit Ablâmitovnıñ davası boyunca gizli şaat sorğuğa çekildi, dep bildire Qırım.Aqiqat mühbiri.
«Bugün Umerov tahallüsli bir şaatnı sorğuğa çektik – bu gizli şaat. Sorğu pek malümatlı olmadı, çünki imayeniñ müim suallerine şaat hatırlamay ya da bilmey, dep cevap berdi. Şaatnıñ aytqanına köre, o, 2016 senesi yanvar ayında batalyon saflarına kirdi, kâr içün, oña 8 biñ ğrıvnâ vade etildi. Batalyonda çeşit işlernen oğraştı, sipirdi, odun pıçtı, hocalıq-turmuş işlerini baqtı. Şaat, Mecit Ablâmitovnı silânen körmedi, taktik azırlıq derslerinde körmedi», – dep tarif etti advokat Ayder Azamatov.
Bundan ğayrı, advokat, Ablâmitovğa üçünci kere mahkeme vaqtına aş berilmey, dep bildirdi.
«Mecitni üçünci kere mahkemege aşsız ketireler ve soy-sopları imayeci vastasınen oña mahkemege aş bermege mecbur. SİZO, mahkemege cevap berip, şimdi quru aş yoq, çünki SİZOda tutulğan şahıslarnı aşnen temin etken teşkilâtnen añlaşma tizilmegen, dep bildirdi. Aqmescitniñ Jeleznodorojnıy rayon prokuraturası da bozuvlarnı qayd etip, tahqiqat izolâtorınıñ yañlışları tüzelsin dep, mahkemege muracaat etti», – dep qoştı Azamatov.
Avgustnıñ 19-nda Rusiye FSBsi «ukrain milliy batalyonında» iştirak etkeninden şübheli sayılğan Qırımnıñ İslâm Terek rayonınıñ sakinini tuttı, dep bildirdi. İslâm Terek rayonınıñ sakinine qarşı cinaiy dava açıldı. Al-azırda şübheli tutuldı. FSB, qırımlı 2016 senesi esas Ukrainağa ketip, «Lenur İslâmov qurğan N.Çelebicihan batalyonına» kirdi, dep bildire.
Qırım Muhtar Cumhuriyetiniñ prokuraturası «Noman Çelebicihan göñülli qırımtatar batalyonında» iştirak etkeni içün Ukraina vatandaşınıñ qanunsız tutuluvı ve evinde tintüv keçirilüvi boyunca cinaiy tahqiqat başlattı.
Daa evel Qırımda qurucısı Lenur İslâmov olğan «Noman Çelebicihan göñülli batalyonınıñ» azaları olaraq tanılıp qabaatlanğan üç qırımtatarına qarşı qabaatlayıcı qarar çıqarılğan edi. Bu birleşmeniñ azaları olğanınen bağlı şübheler ile qırımlılarğa qarşı eki ğıyabiy qarar da çıqarıldı.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
