Rusiye kontrolindeki İçki rayon mahkemesi Enver Topçige qarşı «çaqmama davası» boyunca qabaatlav şaatlarınıñ sorğusını bitirdi. Qabaatlav tarafı yazma delillerni de kösterip başladı, hususan Topçiniñ «qabaatını boynuna alıp kelgeni» oquldı, dep haber ete Qırım.Aqiqat mühbiri.
«Bugünki oturışuvda 2 şaat sorğuğa çekildi – Useinov tahallüsli gizli şaat ve Aqyardaki Moskva devlet universitetiniñ filialında çalışqan ve mütehassıs olğan şaat Martınkin. Gizli şaat bir şey añlatıp olamadı ya da şahsiyeti belli ola bile dep, bazı suallerge cevap bermekten vazgeçti. Bir qabaatlav yoq edi ve bir şey de haber etmedi. Martınkinni aytsaq – FSB hadimleri oña bet ve bayraqlarnen fotoresim kösterdi, o da, FSB hadimlerine bu bayraqlar IŞİD bayraqları ola, dep ayttı. Onıñ tasili aqqında soradıq, o, «arap tili tercimanlığı» bölügini bitirdi, dep cevap berdi, ve «Musulman qardaşlar» ile bağlı islâm mevzuatı boyunca dissertatsiyanı qorçaladı», – dep tarif etti advokat Emil Kurbedinov.
Mahkeme oturışuvı vaqtında qabaatlav tarafı ekspertiza neticelerini ve Enver Topçiniñ evinde keçirilgen tintüv protokolını taqdim etti.
«Şaatlarnıñ sorğusı bitken soñ tahqiqat yazma delillerni kösterip başladı. Bizim fikirimizce, olarnıñ Enver Topçiniñ qabaatlavınen iç alâqası yoq, amma, FSB tahminlerine köre, Suriyede bulunğan Dadaconov Umiconnen daa çoq bağlı. Qadı Enver Topçiniñ qabaatını boynuna alğanını bildirdi, epimiz bilemiz ki, Enverge basqı yapıldı, bir qaç advokat FSB binası ögünde bir qaç saat bekledi, olarnı kirsetmediler, ve Enverden qabaatını boynuna almasını talap etkenler, o, eñ eyi tahqiqat üslübinde yazılğan», – dep ayttı Kurbedinov.
Avgustnıñ 31-nde Rusiye quvetçileri Sudaq, İçki ve Seyitler rayonlarında Enver Topçi, Ayder Ablâkimov, Ridvan Umerov ve Ayder Kadırovnıñ evinde tintüv keçirdi.
Dört qırımlığa qarşı Rusiye Ceza kodeksiniñ 205.6 maddesine istinaden (cinayet aqqında haber etmeme) dava açıldı. Oña köre 100 biñ rublege qadar para cezası, 1 yılğa qadar mecburiy işler ya da aynı müddetke apis cezası berile bile.
Mabüsler uquq qoruyıcı organlarına Umicon Dadajonov ile içtimaiy ağlarda yazışqanını bildirmegeninde qabaatlana. O, FSB bildirgenine köre, «Rusiyede terror teşkilâtı tanılğan «IŞİD» teşkilâtınıñ faaliyetinde iştirak etken edi».
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
