Qırımda yüz bergen patlavlardan soñ Aqyarda ava ücüminde mudafaa sistemalarınıñ arttırılmasını ilân ettiler. Bunı RF Qara deñiz flotunıñ komandanı Viktor Sokolov bildirdi.
Sokolov, ava ücümi silâlarınıñ erte körünmesi içün yarımadanıñ etrafında bir malümat alanı yaratılğanını iddia ete.
"Bu sebepten Qara deñiz flotunıñ quvetleri ve ordusı Qırım yarımadası topraqlarındaki bazalarnıñ, müim arbiy obyektleriniñ ve kritik infraterkipniñ ava ve deñiz dronlarınıñ darbelerinden, duşmannıñ diversiyalarından mudafaa etme ve mina telükesini ortadan yoq etme vazifelerini çezmekteler", - dedi o.
Onıñ sözlerine köre, Rusiye Qara deñiz flotu Ukrayina dronlarını körmek içün radar nezareti mıntaqasını da arttırğan.
Azatlıq Radiosınıñ Qırım.Aqiqat leyhasınıñ jurnalistleri 2014 senesi Rusiye tarafından işğal etilgen Qırım yarımadasında 220-den ziyade Rusiye arbiy obyektini köstergen bir haritanı yayınladılar.
Bu obyektler arasında infraterkibi olğan arbiy uçaq alanları, gemilerniñ ve katerlerniñ yerleştirilmesi mıntaqaları ve yerleri, vesiqalar, silâ, erzaq mağazları, arbiy şeerler, arbiy qısımlar, kazarmalar, ştablar ve idare noqtaları, arbiy tehnika parkları ve ava mudafaası sistemalarınıñ nevbetçilik yerleri, poligonlar ve oqutuv merkezleri, arbiy ve sanayı kompleksiniñ bazı işhaneleri.
Soñki aftalar Ukrayinanıñ qaşı ücümi ile bağlı daa çoq bildirmeler berile. Onıñ tarihı ve yeri aqqında iç bir şey belli degil. Bazıları Ukrayina ordusınıñ nişanı Donbas, bazıları ise işğal etilgen Qırım olacaq deyler.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
