İlhaq etilgen Qırımda Yuqarı Şuma civarındaki gölniñ quruması devam ete, onıñ quruğan tübünde de taş labirinti ehdi bar, dep haber ete Qırım.Aqiqat muhbiri.
Aluştalı coğrafiyaşınas Yevgeniy Moiseyev oktâbrniñ 20-nde bildirdi ki, göl suvnen toldurılmay ve içtimaiy ağlardaki saifesinde gölniñ tübünde otlar ösken foto yerleştirdi.
"Aqiqaten de, yazıq ki, gölnden tek levha qaldı — o, Qırımda suv qıtlığınıñ qurbanı oldı. Soñki kere o 2021 senesi tolu edi. Mesele şunda ki, suv anbarı çeşme suvunen teminlengen edi, amma esas çeşmeni kapt ettiler ve ondan Yuqarı Şuma köyüne suv borusını qurdılar. Bundan soñ, uzun yağanaqlardan soñ, suv tek qışnıñ soñunda, baarniñ başında sıq-sıq peyda ola edi, amma şimdi bu da yoq. Yerniñ unikal ekosisteması yoq etildi, ve bu yerde tritonlarnıñ büyük populâtsiyası yaşağan edi. 1964 senesi göl yanında ekilgen eki sekvoyadendron teregi de telüke astında. Bu sebepten bu yerge "Qırım Kaliforniyası" deyler. Bu devler suv seve", — dep izaatladı Qırım.Aqiqatqa o.
İlhaq etilgen Qırımnıñ suv anbarlarında suv yedekleri sentâbr ayında 11,3 million kubometrge eksildi. Qırımda suv qıtlığı meselesi kerginleşmege devam ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
