Qırımda keçken künü yedi yañı koronavirus hastası qayd etildi. Bu aqta mayısnıñ 12-nde Rusiye kontrolindeki Qırım yolbaşçısı Sergey Aksenov COVID-19 ile küreş operativ ştabınıñ toplaşuvında bildirdi.
«Dördü – Aluştada, tibbiyet hadimleri. Anda endi observator yapılğan edi. Belli yer. Eki insan daa hastalandı, biri Rospotrebnadzor idaresiniñ regionlarara bölüginiñ hadimi – bu qoranta, aqayı hastalanğan edi. Bir kişi – Krasnoperekop rayonınıñ (Tuzla) Poçetnoye köyünde ve Saq rayonında eki tibbiyet hadimi», – dedi Aksenov.
Qırımdaki Rospotrebnadzor idaresiniñ yolbaşçı muavini Dmitriy Krutikovnıñ bildirgenine köre, müessiseleriniñ hastalanğan hadimi de aluştalı ola.
«Qırğınlıq ile küreş tedbirlerinen oğraşqan hadimimiz. Aqaynen apay, olar hastahanege alındı, balaları ve yaqın soyları observatorğa alındı», – dedi Krutikov.
Böylece, al-azırda Qırımda 209 koronavirus hastası qayd etildi, 24-ü çetelden keldi, 21-i – Rusiyeden. 64 kişi tüzelip yahşı oldı. Eki insan vefat etti. Aqyarda 126 COVID-19 hastası qayd etildi, eki kişi vefat etti.
Qırımnıñ Rusiye akimiyeti bildirgenine köre, mayısnıñ 12-nden itibaren mecburiy qoruv maskalarınıñ taqıluvı kirsetile, Qırımda özüni izolâtsiya etüv rejimi mayısnıñ 31-ne qadar uzatıldı, Aqyarda – mayısnıñ 17-ne qadar.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
