Qırımda hastahanede tedaviylengen koronavirus hastalarından yedisi ağır alda buluna. Bu aqta Rusiye kontrolindeki Qırım ükümetiniñ baş nazir muavini Yelena Romanovskaya bildirdi.
«Ne yazıq ki, yedi insan ağır alda reanimatsiyada buluna. Üç kişi – 65 yaşından büyük vatandaşlar, tedaviylevni ve hastalıqnı zorlaştırğan bir sıra hronik hastalıqları bar», – dep qayd etti Romanovskaya.
Onıñ malümatına köre, 218 insan hastahanede buluna, 592 kişi observatorlarda qala.
Qırımda keçken künü altı yañı koronavirus hastası qayd etildi.
Böylece, Qırımda 245 koronavirus hastası qayd etildi. 24-ü çetelden keldi, 21-i Rusiyeden, 84 insan tüzelip yahşı oldı. Eki insan vefat etti, daa ekisiniñ ölüm sebebi belli degil, amma COVID-19 diagnozı qoyulğan edi. Aqyarda 130 koronavirus hastası qayd etildi, eki hasta vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
