Qırımda Rusiye ordusını tekrar "itibardan tüşürüv" maddesi ile apis cezasına mahküm etilgen eski oca Andrey Belozörovnıñ bir yıldan çoqtır vesiqasız qalğanı içün para qazanmağa imkânı yoq.
Rusiye polisi vesiqalarnı qaytarmay, Rusiye prokuraturası ise buña qarşı berilgen muracaatlarğa iç bir şekilde cevap bermey eken.
"E" merkeziniñ kapitanı Sodirov Kabulcon ile beraber Qırımnıñ sözde qanun qoruyıcıları menim vesiqalarımnı, telefonımnı ve noutbukımnı tutıp alğanına artıq bir yıldan çoqtır. Bu qanunsızlıq neticesinde men qanuniy yolnen iş tapıp, para qazanıp ve özüme, apayıma ve 11 yaşındaki qızıma baqıp olamayım. Olar adam degiller, olarğa adiy adamlarnıñ azap çekmesine epsi bir, Qırım prokuraturası ise menim arizalarımnı baqmay bile", - dep ayttı o.
Oca vaziyetniñ cemaatqa bildirilmesi vesiqalarnı ve gacetlerni qaytarmağa yardım eter dep ümüt ete.
2023 senesi mart ayında Rusiyeniñ nezareti astında olğan Aqmescitniñ Merkeziy rayon mahkemesi Qarasuvbazar tehnikumınıñ sabıq ocası Andrey Belozörovnı Rusiye ordusını tekrar "itibardan tüşürüv" maddesi ile 100 biñ ruble para cezasına mahküm etti.
Keçken sene sentâbr ayında Belozörov 13 künge tefqif etilgen ve Qarasuvbazar tehnikumından işten boşatılğan edi. Sebep, ocanıñ Bayraktar pilotsız uçqan cihaz aqqında ukrayin türküsi olğan videonı baqqanı oldı.
Dekabrniñ 9-nda Belozörov Qırım.Aqiqatqa Rusiyeniñ Ukrayinağa büyük istilâsına dair açıq noqta-i nazarı içün Rusiye akimiyeti oña qarşı cinayet davası açacağını ayttı.
Belozörovnıñ bu davanıñ açılmasına sebep olğan yazısında denilir edi: "8 yıldır Donbasta masüm ukrayin balaları ve qadınları Rusiye Silâlı quvetleri tarafından bombalandı, soñki yarım yıl kene RF SQ Ukrayina şeerlerini bombalay ve ukrayinlerni öldüre".
2020 senesi dekabrniñ 23-nde mahkeme oturışı vaqıtnda Belozörov RF Ceza qanunnamesiniñ 280.3 maddesi ile ev apsine alındı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
