Dekabrniñ 25-nde saba Qırımda küçlü yağmur ve furtuna yeli sebebinden 18 meskün yer elektriksiz qaldı, dep bildire «Krımenergo» müessisesiniñ matbuat hızmeti.
«Eñ çoq Yedi Quyu, Qarasuvbazar, Aqşeyh, Bağçasaray, Aqmeçit rayonları ve Bağçasaray zarar kördi. Saat 08.00-de 10 kV 12 elektrik ağı (8-i qısmen) çalışmay edi. 18 meskün yerde (10-u qısmen) 2,5 biñge yaqın qullanıcı elektrik bekley. Eñ çoq – 1,1 biñden ziyade qullanıcı – Bağçasarayda elektriksiz qaldı», – dep aytıla haberde.
Hızmetniñ malümatına köre, dekabrniñ 24-nde saat 8:00-den başlap, furtuna havfı ilân etilgende, «Krımenergo» müessisesinde yüksek azırlıq rejimi ilân etildi.
Salı künü, dekabrniñ 25-nde, ava bozulacaq, dep haber etilgen edi: sılaq qar, yağmur, bazı yerlerde küçlü yağanaqlar ve saniyede 25 metr süratınen esecek furtuna yeli.
«Krımenergo», yarımada sakinlerini dekabr ayında elektrik kesintileri olacağı aqqında tenbiyelegen edi.
2018 senesi iyün ayında Rusiye energetika nazirligi bildirdi ki, işğal altındaki Qırımnıñ Aqyar ve Aqmescit elektrik stantsiyalarında qurucılıq işleri «umumen yekünlendi».
2016 senesi baarde rus energoköprüniñ üçünci pıtağı işini başlağanına baqmadan, Qırımda yarıq söndürmeleri devam etmekte. 2015 senesi dekabrden başlap Herson vilâyetinde energetik tiremelerniñ bozulğanından soñ, Ukrainadan Qırımğa elektroenergiya berilmey. Şimdilik, Qırım öz generatorları, Rusiye generatorları ve Kuban energoköprüniñ elektrik ağını qullana.
