Keriçte yaramay ava ve küçlü yel sebebinden tere az qaldı gaz borusına tüşe edi. Bu aqta Rusiye kontrolindeki şeer memuriyetiniñ yolbaşçısı Sergey Borozdin haber etti.
«Yekâne nevbetçi dispetçer hızmetine Goloşçapov soqağındaki №17 ve №19 evleri arasında qaza vaziyeti aqqında haber keldi. Küçlü ruzgâr neticesinde terek gaz hatları üstünde telükeli şekilde asılıp qaldı. Tedbir alındı. «JilservisKerç», «Krımgazseti» ve «Gorsvet» hadimleri qaza vaziyetini al etti. Mütehassıslar terekni qazıp pıçtı, qazağa yol bermedi», – dep yazdı Borozdin Facebook saifesinde.
Berilgen malümatqa köre, qar çoq yağğanı içün Aqmescitte cemaat naqliyatı işi zorlaştı.
Bundan ğayrı, yaramay ava «Aqmescit» ava limanında tahminen 20 uçuşnıñ keç qalmasına sebep oldı.
Aqmescit yaqınlarında 32 maşina çatışqan yol qazası yüz berdi.
Qırımda ayaz ve qar aqqında furtuna havfı devam ete. Fevralniñ 18-ne qadar ava arareti iklim normasından 7-8 derece az olacaq.
