Moskva kontrolindeki Qırım ükümetiniñ yolbaşçısı Yuriy Gotsanükniñ bildirgenine köre, «Voda Krıma» müessisesinde toplaşuv ötkerildi. Onıñ vaqtında qırımlılarnı içme suvınen temin etüv ve suv teminlev hatlarında onı coyuv eksilmesi muzakere etildi.
Bu aqta Qırım Nazirler şurasınıñ yolbaşçısı Facebook saifesinde yazdı.
«Qaçuvlarnı yahşı kontrol etip, suv coyuv problemini tez al etmek kerek. Aqmescit memuriyetine, nazirlik ve devlet müessiselerine vazife berdim. Müsbet neticeler içün bayağı ipranğan suv teminlev ve suv berüv hatlarını adım-adım yañartmağa kerek olacaq», – dep qayd etti Gotsanük.
Bundan ğayrı, Qırımnıñ Rusiye ükümeti yolbaşçısı qırımlılarnı «yarımadanıñ suv kibi qıymetli resursnı muqayt qullanmalarına» çağırdı.
Daa evel belli olğanı kibi, Aluşta, Kezlev ve Novoozernoye qasabasında fevralniñ 4-nden 5-ne qadar tamir işleri sebebinden suv kesilecek.
Hatırlatamız, Rusiye kontrolindeki Qırımnıñ suv hocalığı ve melioratsiya devlet komiteti, yarımada suv anbarlarında suv yedekleri 2020 senesi iyün ayına qadar yeter ve yarımada suv anbarlarınıñ üçte biri tolu, dep bildirdi.
Yanvarniñ 25-nde Qırım alimleri yarımada sakinlerine suv qıtlığı problemini onı eki kere qullanıp al etmege teklif etti. Olarnıñ fikirince, bu Qırımnıñ köy hocalığını yetmegen resursnen temin etmege ve şeer ve rayonlarnı qızdırmağa yardım etecek.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
