Rusiye quvetçileri tarafından yaqalanğan «Qırım birdemligi» cemaat birleşmesiniñ koordinatorı Dilâver Memetovnı noyabrniñ 27-nde cumaertesi künü mahkemege ketirecekler. Bunı Qırım.Aqiqat mühbiri haber ete.
«Şimdi Dilâver Memetovnı memuriy sebeplerden tutlğanlar odasına alıp ketecekler. Anda gecelecek. Yarın saba saat 10-nda onı mahkemege oturış keçirmek içün ketirecekler», – dedi advokat Rustem Kâmilev.
O Rusiye Federatsiyasınıñ Memuriy uquq bozuvları kodeksiniñ 20.2.2 maddesine istinaden («Cemaat nizamınıñ bozuluvına sebep olğan vatandaşlarnıñ cemaat yerlerinde aynı vaqıtta kütleviy şekilde bulunması ve (ya da) areket etmesi») qabaatlana.
Aqmescitte Qırım garnizon mahkemesiniñ binası yanında Rusiye quvetçileri «Qırım birdemligi»niñ koordinatorı Dilâver Memetovnı ve Abdulla Seydametovnı yaqaladı.
Qanun qoruyıcılar koordinatorğa "tekrar olğan bozuv" aqqıda bildirip, polis bölügine alıp kettiler, sebep noyabrniñ 23-nde Edem Semedlâyevniñ qarşılap almasına kelmesi oldı. Onı polis kapitanı Aleksey Küznetsov yaqaladı.
Rusiye quvetçileri noyabrniñ 23-nde Aqmescitteki vaqtınca tutuv izolâtorınıñ binasına 12 kün memuriy apiste qalğan advokat Edem Semedlâyevni qarşılamağa kelgen faallerni tuttı. Umumen 31 insan tutuldı, aralarında qadın ve balalar bar edi. Bundan ğayrı, yanlarında matbuat kartları olğan jurnalistler «alındı».
Noyabrniñ 24-nde Rusiye kontrolindeki Qırım mahkemelerinde qırımtatar faallerine qarşı memuriy protokollar baqıldı. Aqmescitniñ Kiyev rayon mahkemesi vatandaş jurnalisti Vilen Temeryanovnı 14 künge apiske aldı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti buña qulaq asmay.
