Kremlniñ nezareti astında olğan Qırımnıñ Yuqarı mahkemesi Yañı Kahovkadan jurnalist Sergiy Tsigipanı "casuslıq" qabaatı ile 13 yıl apis cezasına mahküm etken. Bunı TASS Rusiye devlet agentligi haber ete.
"1961 senesi doğma Ukrayina vatandaşı Tsigapa Sergiy Vitalyevıç casuslıqta qabaatlı tanıla, o sert rejim tüzetüv cezahanesinde ceza çekme ile 13 yıl apis cezasına mahküm etile", - dep yazıla bildirmede.
Tsigipa Ukrayina telükesizlik hızmetiniñ agenti olaraq mahsus hızmetlerge ve arbiylerge Rusiye ordusınıñ yerleri aqqında malümat bergeni iddia etile.
Sergiy Tsigipa – Yañı Kahovkadan jurnalist, faal ve ATO veteranı. Büyük cenkniñ başlamasınen göñüllilik ile oğraştı, Ukrayina destegine mitinglerde iştirak etti ve Rusiyeniñ cenüpteki areketleri aqqında yaza edi.
Keçken seneniñ mart ayından o esirlikte edi. Grajdanlıq serbestligi merkeziniñ malümatına köre, 2022 senesi fevralniñ 24-nde o "Yañı Kahovkanıñ malümat mudafaası" leyhasını teşkil etken edi.
Uzun zamandır Sergiy Tsigipanıñ bulunğan yeri bellisiz edi. Uquq qoruyıcılarnıñ malümatına köre, keçken seneniñ oktâbr ayında faal Aqmescit SİZO-sında tutulğan belli oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
