«VKontakte» içtimaiy ağında bir qaç yazını paylaşıp, nefret ve duşmanlıq doğurğanında qabaatlanğan Yalta sakini Elina Mamedovanıñ advokatı Rusiye prokuraturasında tahqiqatçınıñ cinaiy işni toqtatmağa razı olmağanını temyiz etti. Bu aqta advokat Aleksey Ladir Qırım.Aqiqat mühbirine bildirdi.
Onıñ qayd etkenine köre, Mamedovanıñ «duşmanlıq, nefret doğurmaq ve millet mensüpligine köre insanlarnı aşalamaq» niyeti yoq edi. Bunı qıznıñ şeklengen kişi olaraq sorğuğa çekilmesinde aytqanları isbatlay, o, «maqalelerni paylaşqanda olarnı destekleycek bir tefsir qaldırmağanını» qayd etti.
Rusiye tahqiqatçısı, red qararına Mamedovanıñ ana-babasınıñ evinde tintüv keçirilgen soñ ve imayecisi olmağanda Rusiye FSB idaresinde bergen izalarını qoştı. Tahqiqatçınıñ fikirince, Yalta sakininiñ qabaatını içtimaiy ağlarda yazğanlarınıñ psihologik-lingvistik ekspertizasınıñ neticeleri isbatlay.
Bu sene iyünniñ 13-nde Rusiye FSBsi hadimleri Elina Mamedovanı Autka (Çehovo, Yalta) köyündeki evini tintken soñ tuttılar. Rusiye Tahqiqat komitetinde olğan sorğudan soñ onı yiberdiler.
Mamedovağa qarşı Rusiye Ceza kodeksiniñ 282-nci maddesiniñ 1-inci qısmı boyunca «VKontakte» içtimaiy ağında 2014 ve 2015 seneleri paylaşqanları içün cinaiy iş açıldı.
Noyabrniñ 15-nde Rusiye Devlet dumasınıñ deputatları paylaşuv içün cinaiy mesüliyetni lâğu etecek qanun leyhasını birinci oquvda qabul etti. Bu sene iyünniñ 7-nde olğan canlı yayında Rusiye prezidenti Vladimir Putin bunıñ kibi areketler içün cezalar «marazm ve absurd» olmamalı, dedi.
