Qırım yalısında beş yunus balığını (delfin) taptılar, olardan üçü sağ olıp yalığa atıldı, dep bildire, "Kedersiz Deñiz" ("Bezmâtejnoye More") merkezine esaslanıp, "RİA Krım" rusiye haber agentligi.
"İyül 4,5 ve 7-sinde beş yunus balığınıñ yalığa atılğanı qayd etildi. Olardan üçü sağ edi - beyaz yunus balığı Aqyarda (Sevastopol), azovka yunus balığınıñ balası Sudaq rayonında ve afalina - Yalta rayonında. Bu üçünde tek beyaz soyuna yardım etip yetiştirdik. Azovka ve afalina içün bizge keç haber ettiler. Yazıq ki, olarnı qurtarıp yetiştirmedik", - dep haber ettiler teşkilâtta matbuatqa.
Beyanatqa köre, daa eki süt emicilerni (azovka ve afalina) Aqyarda ölü taptılar.
Şimdilik ilhaq etilgen Qırim müessiselerinden bu haberniñ tasdıqı yoq.
Teşkilâtnıñ malümatına köre, yılnıñ başından berli üç yüzden çoq ayvannıñ ölümi qayd etildi, dep yaza matbuat,
Aprelde "Kedersiz Deñiz" teşkilâtı, Qırımda 2019 senesiniñ başından volontörlar, 104 ölü yunus balığını ve deñiz domuzını taptı. Bu sayı keçken yılnıñ mevsimine köre, daa büyüktir.
