Rusiye akimiyeti işğal etilgen Qırımda ileride mabüslerniñ sayısını arttırmaq içün eki yañı tahqiqat izolâtorını quracaq. Bu aqta Ukraina Helsinki insan aqları birliginiñ icra müdiri Aleksandr Pavliçenko Qırım.Aqiqatqa bildirdi.
Ekspertniñ aytqanına köre, Aqmescit SİZOsı tutuv şaraitlerine köre Ukrainada eñ yaramay soylarından biri edi.
«Añlağanıma köre, şeerde bir izolâtor kesen-kes qurulacaq, 1000 kişilik ve 500 kişilik eki blok olacaq. Qırımnı ilhaq etken Rusiye akimiyetiniñ istegi nenen bağlı olğanını bilmeyim. Belki, cezalarnı yerine ketirüv, adliye sistemasınıñ obyektlerini çoqça qurmağa tırışa. Bu vaziyette müsbet ya da menfiy qıymet kesmege olmay, çünki, bir taraftan, laf şaraitlerniñ eyiliştirilmesi aqqında kete, diger taraftan – bu mabüslerniñ sayısını arttırmaq içün qullanıla bile», – dep añlattı Pavliçenko.
Onıñ fikirince, yarımadada yañı SİZOlarnıñ quruluvı – bugün azatlıqta olıp, amma «Qırımda işğalci rejimge qarşı çıqması azatlıqtan marum ete bilgenini» añlağanlar içün telüke ola.
«Ceza-icra sistemasınıñ inkişafı (2018–2026 seneleri)» Rusiye federal maqsat programması çerçivesinde altı izolâtornıñ qurulması planlaştırıla: eki Uzaq Şarqta, birer dane arktik alanda ve Şimaliy-Kavkaz federal okrugında ve eki dane işğal etilgen Qırımda.
SİZOlarnıñ rıqma-rıq tolu oluv problemi Qırımda Rusiye işğalinden soñ peyda oldı. Yekâne tahqiqat izolâtorı Aqmescitte buluna ve rıqma-rıq tolu, dep qayd etken edi Rusiye baş prokurorı Yuriy Çayka ve Qırımnıñ Cezalarnı yerine ketirüv federal hızmetiniñ reberligi.
2018 senesi qavğa çıqtı. Rusiye Cezalarnı yerine ketirüv federal hızmetiniñ müdir muavini Oleg Korşunovğa qarşı dava açıldı. Rusiye tahqiqat komiteti memurnı Aqmescitteki SİZO qurucılığında 200 million ruble masraf etkeninde qabaatladı.
