Qırımda daa bir koronavirus hastası qayd etildi. Hastalarnıñ sayısı 29-ğa arttı. Bu aqta aprelniñ 11-nde Rusiye kontrolindeki Qırım yolbaşçısı Sergey Aksenov Qırımdaki koronavirus yuqunçına qarşı tedbirler operativ ştabınıñ toplaşuvında ayttı.
«Keçken künü daa bir hasta qayd etildi – Yaltada. Müsbet neticeler çıqqan qorantadan ola – ekim ailesinden. Kimsenen alâqada olmadı, izolâtsiya boksında edi. Bu ceetten qolayca oldı», – dep bildirdi Aksenov.
Qırımda aprelniñ 10-nda eki koronavirus hastası qayd etildi. Qırımlılar Tailanddan qayttı, Keriçte yaşaylar.
Aqyarda altı insan hastalandı, dördü tüzeldi.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
