Rusiye kontrolindeki Qırım yolbaşçısı Sergey Aksenov soñki künde qayd etilgen eki yañı koronavirus hastası aqqında haber ete.
«Keçken künü eki yañı koronavirus hastası qayd etildi. Olğan bağlardan. Bağçasaray rayonınıñ jeleznodorojnaya hastahanesinde hasta er adamnen alâqada olğan kişi ve Saq rayonında hasta olğan qadınnıñ aqayı hastalandı», – dep ayttı Aksenov COVID-19 ile küreş tedbirleri operativ ştabınıñ toplaşuvında.
Qırım ve Aqyardaki Rospotrebnadzor idaresiniñ yolbaşçısı Natalya Penkovskayanıñ aytqanına köre, hastalarnıñ alâqada olğan kişiler cedveli kenişletildi.
«Tünevin Bağçasarayda 62 insan, bugün endi 115 kişi aqqında aytamız, alâqada olğanlardan 35-i – tibbiyet hadimidir», – dedi o.
Ştab toplaşuvıda berilgen malümatqa köre, bu gruppadan közetüvge alınğan bir çoq insan cenazege barğan kişilerdir.
Böylece, Qırımda tasdıqlanğan 53 COVID-19 hastası bar. Aqyarda 25 koronavirus hastası qayd etildi. Qırımda ve Aqyarda özüni izolâtsiya etüv rejimi aprelniñ 30-na qadar uzatıldı.
«Qırım aq qorçalayıcı gruppası» bildirgenine köre, aprelniñ 13-nden 19-na qadar işğal etilgen Qırımda ve Aqyarda resmiy şekilde qayd etilgen COVID-19 hastalarınıñs ayısı aman-aman eki qat arttı. Aq qorçalayıcılar, monitoring vaqtında elde etilgen malümat Rusiye akimiyeti derc etken resmiy raqamlarnıñ kerçek olmağanını köstere, dep bildire.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
