Qırımda 2020 yılnıñ soñuna qadar ekimler içün naqliyatta imtiyazlı yürüş uzatıldı. Bu qararnı mayıs 27-sinde Qırım parlamentiniñ mebusları qabul etti.
Bundan ğayrı, imtiyazı olğan tiibiy işçilerniñ cedveli keñleştirildi, endi oña Rusiye Federal tibbiy ve biologiya agentliginiñ hadimleri, Rusiye İİN-niñ tibbiy sanitar bölüginiñ işçileri ve geriatrik ve psihonevrologik internatlarnıñ hadimleri kire.
Daa evel imtiyazlı yürüşniñ uzatıluvı aqqında rusiyeli Qırım başı Sergey Aksönov aytqan edi.
Qırımda 355 koronavirus hastası qayd etildi. 26-sı çetelden, 74-ü – qomşu Rusiyeden keldi. 11 koronavirus hastası vefat etti. Aqyarda – 153 hasta, üçü vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
