İşğal etilgen Qırımda noyabrniñ 17-nde bir qaç künden altı yaşını tolduracaq, amma beş yaşında öldürilgen Darya Pilipenkonen vedalaşalar.
RİA Krım Rusiye haber agentliginiñ haberine köre, qızçıqnen vedalaşmaq içün bir qaç yüz insan keldi – tuvğanları, köydeşleri, balanı qıdırğan göñülliler, Daşa ve oğlan qardaşı qatnağan bala bağçasınıñ terbiyecileri. Facia aqqında kütleviy haber vastalarından eşitken lâqayt olmağanlar da keldi.
Bazı insanlar qızçıqnıñ anasına qarşı agressiv olıp, onı «vedalaşuv merasiminden alıp taşlamağa» talap ettiler.
Darya Pilipenko Aqşeyh rayonınıñ Toq Şeyh (Kropotkino) köyündeki evinden belli olmağan yerge ketip qaytmadı. Qıznıñ ğayıp oluvı aqqında noyabrniñ 13-nde ögey babası haber etti. Qızçıqnı tapmaq içün göñülliler ve dronlar celp etildi.
Noyabrniñ 15-nde saba Qırım ve Aqyardaki Rusiye Tahqiqat komitetiniñ idaresi beş yaşında qızçıq ölü tapıldı, dep bildirdi.
Qıznı öldürgeninden şübheli sayılğan ögey babası yapqanını ayttı. Cinayet sebepleri belli degil.
