Qırımda keçken aftağa baqqanda hastahanege alınğan koronavirus hastalarınıñ sayısı 20% arttı. Tedaviylenmege devam etken yüzden çoq hastanıñ alı ağır ve pek ağır dep qayd etile.
Bu aqta noyabrniñ 25-nde Qırımnıñ Rusiye sağlıq naziri Aleksandr Ostapenko bu yuqunç ile küreş operativ ştabınıñ toplaşuvında bildirdi.
«Koronavirus ve pnevmoniyanen hastahanege alınğan hastalarnıñ seviyesi keçken afta 767 olsa, bu afta 933 oldı. Menim fikirimce, kederli bir şey bar, tedaviylenmege devam etken 109 hastanıñ alı ağır ya da pek ağır. 44 hastanıñ aqcigerleri suniy avalandırıla», – dep qayd etti Ostapenko.
Rospotrebnadzor, noyabr ayında yarımadada koronavirus yuqunçından vefat etkenlerniñ sayısı artmağa devam ete, dep bildirdi. Keçken künü Qırımda 225 COVID-19 hastası qayd etildi. Qırımda pandemiya vaqtında 10212 insan tüzeldi. Qırım sağlıq nazirliginiñ malümatına köre, bu yuqunçtan epidemiya vaqtında 258 kişi vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
