Qırımda tevqif etilgen Qırım.Aqiqat frilanseri (Azatlıq Radiosınıñ leyhası) Vladislav Yesipenkonıñ davası boyunca mahkeme esnası yañıdan başlana. Bunı Qırım.Aqiqt mühbiri haber etti.
Rusiyeniñ nezaretinde olğan Aqmescit rayon mahkemesiniñ oturışı vaqtında davanıñ maiyeti baqılacağı beklenile.
Bundan evel mahkeme oturışı oktâbrniñ 12-nde olıp keçken edi. O zaman, 2021 senesi martnıñ 10-nda Vladislav Yesipenkon ile beraber yaqalanılğan Yelizaveta Pavlenko şaatlıq etti. Vladislav Qıırmğa kelgende onıñ dairesinde qala edi, soñra. Yesipenko yaqalanğan soñ bu dairede tintüv de keçirilgen edi.
Bir aylıq teneffüsniñ sebebei qadı tatilge ketkeni oldı.
BM insan aqları Ukraina Monitoring missiyasınıñ reisi Matilda Bogner sentâbrniñ 23-nde Kyivde taqdim etken yañı maruzasında Qırım.Aqiqatnıñ (Azatlıq Radiosınıñ leyhası) serbest hadimi Vladislav Yesipenko ve Qırımtatar Milliy Meclisiniñ reis muavini Nariman Celâlnıñ tutuluvı aqqında tarif etti.
Qırımdaki mahkeme Vladislav Yesipenkonıñ tevqif müddetini dekabrniñ 18-nece uzattı.
Vladislav Yesipenko davası
Vladislav Yesipenko – Azatlıq Radiosınıñ (Qırım.Aqiqat leyhası) ştattan tış jurnalisti (frilanser), içtimaiy ve ekologik meselelerni aydınlatqan, qırımlılarnıñ soravlarını çıqarğan edi. 2021 senesi martnıñ 10-nda Qırımda Rusiye FSBsiniñ hadimleri tarafından tutuldı. «Ukraina mahsus hızmetleriniñ menfaatları içün» malümat toplağanında ve maşinasında «elnen yapılğan patlayıcı cihaznı» saqlağanında qabaatlandı.
27 kün devamında Yesipenkonı mustaqil advokatlarnen körüştirmediler. Amma «Krım 24» Rusiye devlet telekanalı intervyüsını kösterdi: kanal saytında derc etilgen videoda Vladislav Yesipenko yarımadada Qırım.Aqiqat leyhası içün video çıqarğanını tasdıqlap, çıqarılğanlarnı Ukraina mahsus hızmetlerine de bergenini ayttı.
Mustaqil advokat kirsetilgen Aqmescitteki mahkeme oturışuvında Vladislav Yesipenko Rusiye mahsus hızmetleri tarafından oğratılğan işkence aqqında bildirdi. Anda Yesipenko tayin etilgen advokat Violetta Sineglazovadan vazgeçti. Mahkeme Yesipenkonı 2021 senesi mayısnıñ 11-ne qadar apiste qaldırdı.
Advokat Aleksey Ladinniñ aytqanına köre, Yesipenko mahkemede işkence aqqında aytqan soñ, Rusiye FSBsiniñ hadimleri «onı öldürirler», dep qorquzdı.
Ukraina tış istihbarat hızmeti Qırım.Aqiqatqa cevap berip, FSBniñ Vladislav Yesipenkonıñ Ukraina mahsus hızmetlerinen yapqan işbirligi aqqında "provokatsiyasını izaatlamay», dep bildirdi. Qırım Muhtar Cumhuriyetiniñ prokuraturası Qırımda Vladislav Yesipenkonıñ tutıp apiske alınmasınen bağlı cinaiy tahqiqat başlattı.
Rusiye quvetçileri Vladislav Yesipenkoğa qarşı tahqiqat tedbirleri aqqında resmiy malümat bermey.
Ukraina Tış işler nazirligi, Ukraina ombudsmanı, Avropa ve Halqara jurnalistler federatsiyası Vladislav Yesipenkonı acele azat etmege çağırdı.
Serbest Avropa Radiosı/Azatlıq Radiosınıñ prezidenti Jamie Fly Yesipenkonı acele azat etmege çağırıp, SAR/AR Qırımda tutulğan Qırım.Aqiqat frilanseri bildirgen işkencege açuvlana, dep bildirdi.
